Müharibə və geosiyasi qeyri-sabitlik Avropaya qayıtdıqca, İsveçdə bu ölkənin müstəqil şəkildə, yoxsa yeni Avropa NATO müttəfiqləri ilə tərəfdaşlıqda öz nüvə silahlarını inkişaf etdirməyə cəhd etməsi ilə bağlı müzakirələr qızışır...
Poliqon xəbər verir ki, bu barədə The Times yazır.
Nəşr 1956 və 1957-ci illərdə İsveç hakimiyyətinin milli nüvə silahı proqramına hazırlıq çərçivəsində Laplandiyada hərbi poliqonda gizli şəkildə güclü bombalar partlatdığını xatırladır.
Nəşr qeyd edir ki, indiyədək müzakirələr spekulyativ olaraq qalır və hökumətin nüvə başlıqlarının yaradılmasına ciddi yanaşdığına dair heç bir sübut yoxdur, lakin müzakirələr artıq siyasi müstəviyə çatıb.
Hakim koalisiyanın dəstəyindən asılı olan sağçı İsveç Demokratlar partiyasının lideri Cimmi Akesson əvvəllər demişdi ki, İsveçin nüvə texnologiyası sahəsində çoxdan böyük təcrübəsi var. Lakin siyasi iradə fərqli bir şey tələb edirdi. Hesab edirəm ki, bu vəziyyətdə hər şey nümayiş etdirilməlidir.
Bir neçə həftə sonra İsveç Müdafiə Tədqiqatları İnstitutunun tədqiqatçısı Robert Dals seminarda bildirib: "İndi İsveç komponentli müstəqil nüvə silahlarını müzakirə etməliyik".
Bu fikri Avropa Parlamentinin üzvü Alisa Teodoresku Mave də dilə gətirib və hesab edir ki, İsveç ümumi Avropa nüvə silahı strategiyasında öz rolunu oynamalıdır.
Nəşrin yazdığına görə, İsveçin mövcud nüvə dövlətinin əhəmiyyətli yardımı olmadan nüvə silahı yaratmaq üçün texnoloji və ya sənaye potensialına malik olub-olmadığı aydın deyil. Ölkədə elektrik enerjisinin demək olar ki, üçdə birini təmin edən altı atom elektrik stansiyası olsa da, sonuncu belə elektrik stansiyası 40 il əvvəl tikilib.
İsveç Müdafiə Tədqiqatları İnstitutunun nüvə silahı üzrə eksperti Martin Qoliat bildirib: "Bu, çox böyük sənaye layihəsi olardı. Nüvə silahları üçün lazım olan materialların istehsalı üçün bütün infrastruktur da daxil olmaqla, çox şey inkişaf etdirilməlidir. Bu, ciddi investisiya tələb edəcək. Zənnimcə, lazımi resursları tapmaq demək olar ki, mümkün olmayacaq".
Poliqon.info
