“Ermənistanda 2020-ci ilin 44 günlük müharibəsindən dərhal sonra, ölkə dərin siyasi böhrana girəndə, demokratiyanı sarsıtmaq üçün bütün vasitələrdən istifadə edildi”.
“Cebheinfo.az” xəbər verir ki, bunu Ermənistanın Baş naziri Nikol Paşinyan sentyabrın 30-da Avropa Şurası Parlament Assambleyasının payız sessiyasındakı çıxışında deyib.
O əmin edib ki, Ermənistanın dövlətçiliyini və müstəqilliyini sözün əsl mənasında xilas edən məhz demokratiya olub:
"Biz dedik ki, xalqdan aldığımız hakimiyyəti heç kimə verə bilmərik, ancaq onu xalqa qaytara bilərik. 2021-ci ilin aprelində mən istefa verdim, nəticədə ölkə parlamenti buraxıldı və sərhədlərin gərginləşməsi, Ermənistanın suveren ərazilərinin işğalı və informasiya ilə əlaqədar növbədənkənar parlament seçkiləri keçirildi.
Xalqdan etimad aldıq. Qeyri-zorakı “məxməri inqilaba” rəhbərlik edən siyasi qüvvə nəinki yenidən səslərin əksəriyyətini qazandı, həm də konstitusiya çoxluğunu formalaşdırdı”, - Baş nazir qeyd edib.
Onun fikrincə, bu, bir əsas səbəbdən baş verdi:
“Xalq başa düşdü ki, bu seçkilər Ermənistanda xalq hakimiyyətinə zəmanət verir. Xalq hakim çoxluğa xalqın hakimiyyətini və suverenliyini, müstəqilliyini, dövlətçiliyini qoruyub saxlamaq üçün mandat verdi.
Mən birmənalı şəkildə qeyd edə bilərəm ki, bu gün Ermənistanda hakimiyyət demokratiyanın qarantı olan xalqa məxsusdur və bu gün Ermənistan həmişəkindən daha müstəqil, daha çox dövlət kimi, həmişəkindən daha suveren, həmişəkindən daha demokratikdir”.
