AFFA İntizam Komitəsinin növbəti iclası keçirilib.
İdman.biz xəbər verir ki, iclasda Misli Premyer Liqasında VI turun bir sıra oyunlarında intizam qaydalarının tələbləri pozulduğuna görə müvafiq qərarlar qəbul edilib.
“İmişli” – “Zirə” oyununda Əsasnamənin 14-cü maddəsinin 11-ci bəndinin tələbləri pozulduğuna görə (media sektora kənar şəxslərin daxil olması) “İmişli” klubu 1000 manat cərimə edilib.
“Qarabağ” – “Qəbələ” oyununun 1-ci dəqiqəsində “Qəbələ” klubunun 30 nömrəli futbolçusu Prins Ovusu ciddi qayda pozuntusuna görə birbaşa qırmızı vərəqə aldığı üçün 2 oyun cəzalanıb. “Qəbələ” klubu 1000 manat cərimələnib.
“Şamaxı” – “Araz-Naxçıvan” oyununda isə Naxçıvan təmsilçisinin 5 futbolçusu sarı vərəqə aldığı üçün “Araz-Naxçıvan” klubu 700 manat ziyana düşüb.
“Turan Tovuz” – “Kəpəz” oyununda “Kəpəz” klubunun azarkeşləri tərəfindən rəqib komandanın ünvanına kütləvi şəkildə təhqiramiz ifadələr səsləndirildiyinə görə “Kəpəz” klubu 5000 manat cərimə ödəyəcək.
“Sabah” – “Sumqayıt” oyununun gedişində işıq söndüyünə görə matç 20 dəqiqə gecikdiyi üçün “Sabah” klubu 1000 manat cərimələnib. Həmçinin “Sabah”da 4 nəfər sarı vərəqə aldığı üçün klub 700 manat ziyana düşüb.
Oyunun 90+4-cü dəqiqəsində “Sabah” klubunun məşqçisi Castinas Qasiunas hakimi təhqir etdiyinə görə birbaşa qırmızı vərəqə aldığı üçün 4 oyun cəzalanıb. “Sabah” klubu isə 10000 manat cərimələnib.
