Payız səyahətləri təhlükədə - Ekspert çıxış yollarını açıqladı

Payız mövsümünün başlaması ilə birlikdə qeyri-sabit və yağışlı hava şəraiti müşahidə olunur. Belə havalarda insanlar səyahət planlarını dəyişə bilirlər. Maraqlıdır, payız turizmə necə təsir göstərir və bu mövsümdə vətəndaşlar hansı turizm növlərinə üstünlük verirlər?

News24.az-a açıqlamasında turizm üzrə ekspert Rəhman Quliyev bildirib ki, yağışlı və qeyri-sabit hava xüsusilə çimərlik turizmi, dağ yürüşləri və kənd turizmi kimi açıq hava fəaliyyətlərinə mənfi təsir göstərir:

"Bu vəziyyət bölgələrdə yerləşən hotel və istirahət mərkəzlərinin doluluq səviyyəsinin azalmasına, son dəqiqə ləğvlərinin artmasına və bron göstəricilərinin aşağı düşməsinə səbəb olur. Turistlər mövcud hava risklərini nəzərə alaraq səyahətlərini təxirə salır və ya tamamilə ləğv edirlər ki, bu da daxili turizm axınında durğunluq yaradır". 

Ekspert əlavə edib ki, kəskin hava hadisələri nəqliyyat infrastrukturunda çətinliklər yaradaraq yolların bağlanmasına və hərəkətin məhdudlaşmasına səbəb ola bilər:

"Bu isə həm turistlərin, həm də turizm xidmət təminatçılarının fəaliyyətinə mənfi təsir göstərir. Buna baxmayaraq, əlverişsiz hava şəraiti alternativ turizm növlərinə marağı artırır. Belə şəraitdə şəhər turizmi, muzey və mədəniyyət turları, sağlamlıq və SPA mərkəzləri daha çox diqqət çəkir".

Ekspert qeyd edib ki, hava amili turizm bazarında istehlakçı davranışlarının fərqlənməsinə səbəb olur.

R.Quliyev ümumilikdə vurğulayıb ki, hava şəraiti turizmin planlaşdırılmasında strateji risk faktorudur:

"Azərbaycanda turizm siyasətində çevik yanaşmaların tətbiqi, mövsümi adaptasiya imkanlarının genişləndirilməsi və alternativ turizm növlərinin inkişafı bu risklərin azaldılması baxımından böyük əhəmiyyət kəsb edir". 

Xeyrənsə Piriyeva