Azərbaycanda təşkil edilən III MDB Oyunları çərçivəsində bu gün 10 idman növü üzrə yarışlar keçiriləcək.
QOL.az xəbər verir ki, Gəncə İdman Sarayında qız və oğlan voleybolçuların yarımfinal və qrup oyunları keçiriləcək.
Sözügedən arenada güllə atıcılığı üzrə təsnifat və final mərhələləri də olacaq. Qılıncoynatmanın sablya növü üzrə qadınların fərdi mübarizələri, həmçinin 3x3 basketbol üzrə qızlar və oğlanlar arasında növbəti qarşılaşmalar da Gəncə İdman Sarayında baş tutacaq.
Yevlax Olimpiya İdman Kompleksində isə kişi boksçular arasında 46, 48, 50, 52, 54, 57, 60, 63, 66, 70, 75, 80, +80 kq çəki dərəcəsində final görüşləri keçiriləcək.
Qəbələ Olimpiya İdman Kompleksində qız və oğlan badmintonçular arasında qoşa və fərdi yarışların final mərhələsi təşkil olunacaq.
Göygöl Olimpiya İdman Kompleksində cüdoçular arasında 1/4 final, yarımfinal, həmçinin bürünc və qızıl medal uğrunda görüşləri keçiriləcək. Mingəçevirdə avarçəkmə, həmçinin kayak və kanoe üzrə final yarışları keçiriləcək.
Kamandan oxatma yarışları isə Xankəndi şəhər stadionunda olacaq.
