İsraillə dolayı atəşkəs danışıqları aparmaq üçün HƏMAS-ın nümayəndə heyətinin Misirə gəldiyi bildirilir. Tərəflər Qəzzada atəşkəsin şərtlərini və məhbusların azad edilməsini müzakirə edəcəklər. ABŞ prezidenti Donald Tramp Qəzza danışıqlarının indiyədək “çox müsbət” keçdiyini və atəşkəsin birinci mərhələsinin bu həftə tamamlanmalı olduğunu bildirib.
Reyting.az xəbər verir ki, D. Trampın Qəzza ilə bağlı təklifi iki ildir davam edən müharibədə tərəflərin razılığa gəldiyi ən yaxın təklif hesab edilir. HƏMAS-ın planı qismən qəbul etməsi beynəlxalq ictimaiyyətdə ümidləri artırıb. Lakin danışıqların kritik məqamları ilə bağlı hələlik qəti razılıq əldə olunmayıb.
Qeyd olunur ki, Qahirədə keçiriləcək danışıqlar yaxın günlərdə prosesin gedişatını müəyyən edəcək. Müzakirəçilər planla bağlı qalan maneələri həll etməyə çalışacaqlar. Danışıqlarda İsrail, Fələstin, ABŞ və ərəb nümayəndələrinin iştirakı gözlənilir.
Trampın təqdim etdiyi 20 bəndlik planda HƏMAS bütün girovları 72 saat ərzində azad etməli, hakimiyyəti transmilli hakimiyyətə təhvil verməli və tərksilah olunmalıdır. Bunun müqabilində İsrailin öz qoşunlarını tədricən çıxaracağı və 1000-dən çox fələstinlini azad edəcəyi gözlənilir.
“Guardian” yazır ki, təklif Qəzzaya humanitar yardımın artırılmasını və az qala, dağılmış ərazilərin bərpasının maliyyələşdirilməsini də əhatə edir.
HƏMAS planda yalnız üç bəndlə razılaşdığını açıqlayıb: girovların azad edilməsi, hakimiyyətin təhvil verilməsi və İsrail qoşunlarının çıxarılması.
Hərəkat bəyan edib ki, digər məqamlar Fələstin tərəfləri ilə birgə həll olunmalıdır.
HƏMAS-ın bəyanatına görə, planın ən mübahisəli tərəfləri tərksilah və İsrailin geri çəkilmə qrafikidir. Qrup bu məqamların daha əhatəli danışıqlar tələb etdiyini vurğulayıb. Tərəflər Qahirədə keçiriləcək danışıqlarda sazişin bu kritik elementlərini müzakirə edəcəklər.
HƏMAS İsrailin tam olaraq geri çəkilməsini və razılaşma yerinə yetirilmədiyi təqdirdə beynəlxalq zəmanətlərin verilməsini tələb edir. Bu tələblərin necə yerinə yetiriləcəyi Qahirədəki danışıqların gedişinə birbaşa təsir edəcək.
Onu da qeyd edək ki, dünya 67 mindən çox insanın həyatına son qoyan və təxminən 170 min insanın yaralanmasına səbəb olan bu münaqişənin bitməsini diqqətlə izləyir.
Y. QACAR
