ABŞ-ın tanınmış ali təhsil ocaqlarından biri olan Brown Universiteti, beynəlxalq tələbələrin təhsil hüquqlarını məhdudlaşdıra biləcək yeni viza qaydalarına qarşı çıxış edib. Universitet rəhbərliyi ABŞ Daxili Təhlükəsizlik Nazirliyinə (DHS) müraciət edərək, "sabit viza müddəti və akademik məhdudiyyətlər" tələb edən təklifin geri çəkilməsini tələb edib.
AzEdu.az xarici mənbədən aldığı məlumata əsasən xəbər verir ki, yeni qayda layihəsinə əsasən, beynəlxalq tələbələrin viza müddətləri sabit vaxt çərçivəsi ilə məhdudlaşdırılacaq və əlavə akademik uzadılmalar üçün daha sərt prosedurlar tələb olunacaq. Bu isə tələbələrin təhsilini vaxtında tamamlaya bilmədikləri hallarda ciddi hüquqi və status problemləri ilə qarşılaşmalarına səbəb ola bilər.
Brown Universiteti məsələ ilə bağlı yaydığı açıqlamada bildirib:
"Təklif olunan bu dəyişikliklər yalnız tələbələr üçün deyil, həm də ABŞ universitetlərinin beynəlxalq akademik rəqabətliliyinə mənfi təsir göstərəcək. Biz tələbələrin təhlükəsiz və sabit akademik mühitdə təhsil almalarını təmin etməyə çalışırıq".
Universitet rəsmiləri əlavə ediblər ki, bu cür məhdudiyyətlər ABŞ-nin ali təhsil sektorunda beynəlxalq tələbələr üçün cəlbediciliyini azalda bilər və uzunmüddətli nəticələr doğura bilər.
Hazırda DHS tərəfindən təklif olunan qaydalar ictimai rəy üçün açıqdır və müxtəlif təhsil təşkilatlarının, hüquq müdafiə qruplarının və universitetlərin fikirləri nəzərə alınmaqla son qərar veriləcək.
