İndoneziya, Azərbaycan və Pakistan Qəzza zolağında münaqişədən sonra yaradılması planlaşdırılan beynəlxalq sabitləşdirmə qüvvələri üçün qoşun tədarük etməyə əsas namizədlər hesab olunur.
"Operativ Məlumat Mərkəzi-OMM" "Politico" nəşrinə istinadən xəbər verir ki, bu barədə adlarının açıqlanmaması şərti ilə danışan ABŞ-ın hazırkı və keçmiş müdafiə rəsmiləri məlumat verib.
Məlumata görə, qüvvələrin tərkibi ilə bağlı danışıqlar hazırda davam edir və hələ heç bir ölkə yekun qərar verməyib və ya rəsmi öhdəlik götürməyib.
Bununla belə, ABŞ müdafiə rəsmisi bu üç ölkənin prosesə ən çox maraq göstərən tərəflər olduğunu bildirib.
Bu təşəbbüs, Prezident Trampın Qəzzada sülhə dair 20 bəndlik planının mühüm tərkib hissəsidir. Plana əsasən, ABŞ HƏMAS və İsrail arasında müharibəni bitirmək, Qəzzanın demilitarizasiyası və yenidən qurulmasına nail olmaq üçün müvəqqəti sabitləşdirmə qüvvələrinin yerləşdirilməsinə çalışacaq. ABŞ tərəfi Qəzzada heç bir Amerika əsgərinin olmayacağını, lakin ərəb və digər tərəfdaşlarla birlikdə yoxlanılmış Fələstin polis qüvvələrinin təliminə və dəstəklənməsinə yardım edəcəyini bəyan edib.
