ABŞ prezidenti Donald Tramp Ukrayna üçün Çinə tətbiq edilən yeni rüsumlar hesabına maliyyələşdiriləcək “qələbə fondu” yaratmaq niyyətindədir.
"Operativ Məlumat Mərkəzi-OMM" xəbər verir ki, bu barədə “The Telegraph” qəzeti öz mənbələrinə istinadən məlumat yayıb.
Məlumata görə, artıq yeni fondun yaradılması prosesi başlanıb. Tramp ABŞ maliyyə naziri Skott Bessentə Ukrayna lideri Vladimir Zelenskinin oktyabrın 17-də Vaşinqtona səfərindən əvvəl “qələbə fondu” ilə bağlı plan təqdim etməyi tapşırıb.
“Donald Tramp Ukraynada Çinə tətbiq edilən yeni tariflər hesabına maliyyələşdiriləcək qələbə fondu yaratmağa çalışır”, - deyə qəzet qeyd edib.
Tramp daha əvvəl noyabrın 1-dən Çindən idxal olunan mallara əlavə 100 faiz gömrük rüsumu tətbiq ediləcəyini açıqlayıb. Bəzi ekspertlər hesab edirlər ki, ABŞ lideri bu addımla Pekinlə danışıqlarda Vaşinqtonun mövqeyini gücləndirməyə çalışır.
Oktyabrın sonu və ya noyabrın əvvəlinə planlaşdırılan Cənubi Koreyada keçiriləcək APEC sammitində Trampın Çin prezidenti Si Cinpinlə görüşü gözlənilir.
ABŞ maliyyə naziri Bessent bildirib ki, 85 senatordan ibarət qrup prezidentə Rusiya neftini almağa davam edən Çinə 500 faiz tariflər tətbiq etmək səlahiyyəti verməyə hazırdır.
Bundan əlavə, Zelenski və Tramp cümə günü Ağ Evdə görüşməyi planlaşdırırlar. Tramp daha əvvəl bildirmişdi ki, Zelenski bu görüşdə Kiyevə “Tomaqavk” raketlərinin verilməsini tələb etmək niyyətindədir.
