Hər xalqın tarixində elə günlər olur ki, illər keçsə də o günlərin işığı sönmür. Azərbaycan üçün belə günlərdən biri — 17 oktyabr, Füzuli Şəhəri Günüdür.
Bu tarix təkcə bir şəhərin azad olunma günü deyil, Azərbaycan xalqının yenilməz ruhunun, Vətən sevgisinin və böyük Zəfərin simvoludur.
44 günlük Vətən Müharibəsinin unudulmaz səhifələrindən biri məhz bu gündə yazıldı.
Azərbaycan Ordusu, Ali Baş Komandan İlham Əliyevin rəhbərliyi ilə Füzuli şəhərini düşmən işğalından azad etdi. O gün, uzun illər susmuş Füzuli torpaqları yenidən azadlıq nəfəsini duydu. Dağıdılmış evlərin, viran qalmış küçələrin yerinə ümid, qürur və sevinc qayıtdı.
Bu gün Füzuli təkcə azad olunmuş bir şəhər deyil – o, yenidən doğulan bir məkandır. Azadlıqdan sonra burada həyat sıfırdan başlayıb. Şəhərdə yeni yollar salınır, müasir binalar, məktəblər, xəstəxanalar tikilir, hava limanı fəaliyyət göstərir, yaşayış məhəllələri bərpa olunur.
Füzuli artıq ağıllı şəhər konsepsiyası ilə inkişaf edir. Bu, həm müasir texnologiya, həm də milli ruhun vəhdətidir. Bir vaxtlar dağıdılmış bu torpaqlarda indi uşaqların gülüş səsi, tikinti səsindən daha güclü gəlir.
Füzuli Şəhəri Günü – həm xatirə, həm də ümid günüdür. Biz bu gün şəhidlərimizi minnətdarlıqla anırıq, onların qanı ilə yazılmış Zəfəri qoruyuruq. Eyni zamanda, Füzuliyə qayıdan ailələr bu günü ikinci doğum günü kimi qeyd edirlər.
Bu gün Füzuli, Azərbaycanın yenidənqurma və gələcəyə inam rəmzidir. Burada həyat yenidən başlayır. Daha güclü, daha müasir, daha gözəl şəkildə!
Füzuli Şəhəri Günü isə hər bir azərbaycanlının qəlbində Qələbə Gününə aparan yolun xatirəsi kimi yaşayır. Bu gün bu torpağın hər daşı, hər ağacı bizə bir həqiqəti deyir: Azadlıq əbədidir, Füzuli əbədidir, Azərbaycan əbədidir!
Jalə Əliyeva
Millət vəkili,
Milli Məclisin ailə, qadın, uşaq məsələıəri komitəsinin sədr müavini
