OpenAI şirkəti gündəlik axtarışı süni intellektlə söhbətə çevirən Atlas brauzerini istifadəyə verib. Hazırda brauzer yalnız macOS istifadəçiləri üçün əlçatandır.
QHT.az xəbər verir ki, Atlas istifadəçi adından məlumat axtara, görüş sifariş edə və ya onlayn alış-veriş səbəti yarada bilir. Şirkətin direktoru Sem Altman bildirib ki, brauzerlərin gələcəyi “söhbətə bənzəyir” və süni intellekt bu sahədə yeni imkanlar yaradır. Brauzerin əsas yeniliyi “brauzer yaddaşı” funksiyasıdır — ChatGPT ziyarət edilən saytları xatırlayaraq axtarışları fərdiləşdirir. ChatGPT Plus istifadəçiləri üçün “agent rejimi” isə saytların təhlili, səfər planlaması və sifarişlər kimi əməliyyatlara imkan verir.
Atlasın interfeysi klassik axtarış paneli əvəzinə söhbət sahəsi ilə fərqlənir və istifadəçiyə ChatGPT ilə paralel işləməyə şərait yaradır.
R.İmanov
