Tədqiqatlar göstərir ki, uşaq sahibi olan qadınların gəlirləri çox vaxt əvvəlki səviyyəyə tam qayıtmır və bu fərq uzunmüddətli olur.
Pravda.az bildirir ki, qadınlar doğuşdan sonra işdən müəyyən müddət üçün ayrıldıqları və ya çevik iş rejiminə keçdikləri zaman gəlir itkisi ilə üzləşirlər. Bu, onların karyera inkişafını ləngidir və gələcəkdə əmək haqqı səviyyəsinə mənfi təsir göstərir.
Eyni vəziyyətdə olan kişilərdə isə belə bir fərq müşahidə edilmir; onlar doğuş və valideynlik səbəbindən karyeralarında ciddi fasilə yaşamırlar və gəlirləri daha sabit qalır.
Mütəxəssislər bildirir ki, bu vəziyyət iş yerlərində qadınlara dəstəyin az olması, valideyn məzuniyyətlərinin qeyri-bərabər paylanması və gender stereotiplərinin davam etməsi ilə bağlıdır. Bu da qadınların iş həyatında irəliləməsini çətinləşdirir və gəlir bərabərsizliyini artırır.
Son illərdə bəzi ölkələrdə analara iş yerlərində çevik iş saatları, uşaq baxımı xidmətləri və karyera dəstəyi proqramları təklif edilsə də, bu tədbirlər hələ geniş yayılmayıb və ümumi problemi tam həll etmir.
Ekspertlər vurğulayırlar ki, qadınların karyeralarında ədalətli inkişafı təmin etmək üçün iş yerlərində gender bərabərliyi, valideyn məzuniyyətlərinin həm kişilər, həm də qadınlar arasında ədalətli paylaşımı və sosial dəstək mexanizmlərinin gücləndirilməsi zəruridir.
Əminə Bayramova
