BAKI, 24 oktyabr. TELEQRAF
ABŞ-nin iki böyük Rusiya neft istehsalçısı olan "Rosneft PJSC" və "Lukoil PSJC"-ə sanksiya elan etdikdən sonra supertankerlərin kirayə qiymətləri yüksəlib.
Teleqraf "Bloomberg"- ə istinadən xəbər verir ki, fyuçers kirayə qiymətləri cümə axşamı günü 16 faiz artaraq 2023-cü ilin əvvəlindən bu yana ən yüksək səviyyəyə çatıb. Yaxın Şərq-Çin marşrutu üzrə çox böyük xam neft daşıyıcılarının dekabr ayı müqavilələri 13 faiz artıb.
Sanksiyalardan sonra Rusiya xam neftinin əsas alıcıları olan Hindistan və Çindəki neft emalı zavodları tədricən bazardan çəkiləcəklərini və potensial tədarük boşluğunu doldurmaq üçün Yaxın Şərq mənbələrinə müraciət edəcəklərini açıqlayıblar.
"Oil Brokerage Ltd."-nin Qlobal Göndərmə Tədqiqatı rəhbəri Anup Sinq ABŞ-nin OFAC ( ABŞ Xəzinədarlıq Departamentinin Xarici Aktivlərə Nəzarət Ofisi) sanksiyaları səbəbindən Rusiya istehsalçılarına olan tələbin daha güclü və uzunmüddətli olacağını bildirib.
ABŞ-nin bu addımı həm Bayden, həm də Tramp administrasiyasının Asiya neft emalı şirkətlərini Rusiya xammalının alışını dayandırmağa inandırmaq üçün uzunmüddətli cəhdlərinin davamı kimi qiymətləndirilir. Lakin bu səylər indiyə qədər Rusiyanın neft ticarətinə təsir göstərə bilməyib.
Beynəlxalq Enerji Agentliyinin (IEA) məlumatlarına görə, Rusiya avqustda gündə təxminən 7,3 milyon barel neft ixrac edib ki, bu da qlobal xam neft və emal edilmiş yanacaq istehlakının təxminən 7 faizini təşkil edir.
