Kamerunda etirazlar zamanı dörd nəfər həlak olub
Ajans.az xəbər verir ki,regional qubernator Samuel Dieudonné Diboua açıqlamasında bildirib ki, polis postlarına hücum edilib və təhlükəsizlik qüvvələri özlərini müdafiə etməyə məcbur olublar. Etirazlar müxalifət namizədi İssa Çiroma Bakarinin tərəfdarlarının bir neçə şəhərdə aksiyalara qoyulan qadağaya etiraz etməsi ilə başlayıb. Onlar təhlükəsizlik qüvvələri ilə toqquşublar. Çiroma Bakari oktyabrın 12-də keçirilən prezident seçkilərində qalib gəldiyini bəyan edərək, 43 ildir hakimiyyətdə olan prezident Pol Biyaya meydan oxuyub. Hakim Xalq Demokratik Hərəkatı Partiyası (CPDM) bu iddiaları rədd edib. Qubernator Diboua baş verənləri “qəsdən planlaşdırılmış zorakılıq aktları” adlandırıb və onları ictimai asayişə, eləcə də milli təhlükəsizliyə qarşı ciddi hücum kimi qiymətləndirib. “Təəssüf ki, dörd nəfər həyatını itirib”, – o bildirib. Qubernator əlavə edib ki, təhlükəsizlik qüvvələrinin bir neçə əməkdaşı da yaralanıb və hadisə ilə bağlı araşdırma başladılıb. Etirazların mərkəzlərindən biri Çiroma Bakarinin doğulduğu Qarua şəhəri olub. Polis burada etirazçılara qarşı gözyaşardıcı qaz və su şırnaqlarından istifadə edib. Nümayişçilər hakim partiyanın “seçki nəticələrini oğurlamağa” çalışdığını iddia ediblər. Etirazlar Çiroma Bakarinin həm ölkə daxilindəki, həm də diasporadakı tərəfdarlarını “Kamerunu azad etmək üçün” dinc yürüşlərə çağırmasından sonra başlayıb. Hakimiyyət orqanları isə konstitusiya şurasının rəsmi nəticələri açıqlayacağı bazar ertəsinə qədər bütün toplaşmaları qadağan edib. Qaruada aksiyalar əvvəlcə dinc xarakter daşısa da, polis kütləni dağıtmaq üçün gözyaşardıcı qaz tətbiq etdikdən sonra vəziyyət gərginləşib. Etirazçılar “Biz səsvermənin həqiqətini tələb edirik” və “Biz Çiroma istəyirik” kimi şüarlar səsləndiriblər. Sosial mediada yayılan video müraciətində Çiroma Bakari səsvermədə təxminən 55 faiz səs topladığını, bunun da seçicilərin 80 faizinin iştirakı ilə baş verdiyini iddia edib. 76 yaşlı keçmiş rabitə naziri olan Çiroma Bakari, 92 yaşlı prezident Pol Biyaya qarşı əsas rəqib kimi çıxış edib. CPDM partiyası onun “özünü qalib elan etməsini” qanunsuz adlandırıb və yalnız Konstitusiya Şurasının nəticələri rəsmi şəkildə elan edə biləcəyini xatırladıb. Müxalifət nümayəndələri seçkilərin saxtakarlıqlarla, o cümlədən bülletenlərin doldurulması ilə müşayiət olunduğunu bildiriblər. Lakin Konstitusiya Şurası səkkiz ərizəni rədd edərək, “qanunsuzluqlara dair kifayət qədər sübutun olmadığını” bəyan edib. Çiroma Bakari şuranın Biya tərəfindən təyin olunmuş hakimlərdən ibarət olduğunu əsas gətirərək nəticələrə etiraz etməyib və özünü “qanuni prezident” elan edib.
