Şirkətin bazar dəyəri 2023-cü ilin səviyyəsinə geriləyib...
Poliqon xəbər verir ki, Rusiyanın ən böyük neft şirkətlərindən biri olan “Lukoil”in səhmləri Moskva Birjasında 5 400 rubl həddindən aşağı düşərək son iki ilin ən aşağı səviyyəsinə enib. Bu, 2023-cü ilin əvvəlindən bəri qeydə alınan ən zəif göstəricidir.
Analitiklərin bildirdiyinə görə, qiymətlərin enməsi bir neçə amillə bağlıdır: ABŞ-ın son sanksiya paketinin təsirləri, Rusiya neftinin ixracına qarşı artan təzyiqlər və qlobal enerji bazarlarında qeyri-müəyyənlik. “Lukoil”in əsas ixrac marşrutlarının məhdudlaşdırılması və valyuta gəlirlərinin azalması da şirkətin maliyyə sabitliyinə mənfi təsir göstərib.
Bundan əlavə, Moskva birjasında ümumi tənəzzül fonunda neft-qaz sektoruna olan investor inamı da zəifləyib. Ekspertlər qeyd edirlər ki, “Lukoil” səhmlərinin düşməsi Rusiya enerji sənayesindəki ümumi struktur problemlərin əlamətidir və yaxın aylarda vəziyyətin sabitləşməsi üçün hökumətin əlavə müdaxiləsinə ehtiyac ola bilər.
Poliqon.info
