Geyimlərin yuyulma tezliyi geyimin növündən, istifadə müddətindən və şəraitdən asılıdır.
Pravda.az bildirir ki, bütün geyimlər üçün eyni qayda yoxdur, amma gigiyena və dərinin sağlamlığı baxımından bəzi əsas prinsiplərə əməl etmək vacibdir.
Dəriyə birbaşa təmas edən geyimlər — daxili geyim, corab, idman paltarları və futbolka hər istifadədən sonra yuyulmalıdır. Çünki bu geyimlər tər və bakteriya ilə birbaşa təmasda olur və təmizlənmədikdə dəri infeksiyalarına və xoşagəlməz qoxuya səbəb ola bilər.
Digər gündəlik geyimlər — şalvar, sviter və pijamalar 3–4 dəfə geyindikdən sonra yuyula bilər. Bu növ geyimlər bədənlə birbaşa təmasda olmadığından daha az tezliklə təmizlənməsi kifayətdir.
Açıq havada geyilən geyimlər — gödəkçə, palto və kostyumlar tez-tez yuyulmağa ehtiyac duymur. Bu paltarları yalnız çirkləndikdə və ya qoxu əmələ gəldikdə təmizləmək tövsiyə olunur.
Dermatoloqlar xəbərdarlıq edir ki, artıq yuma paltarların tez köhnəlməsinə və ətraf mühitin zərər görməsinə səbəb olur. Əsas məqsəd gigiyenanı qorumaqla yanaşı, geyimlərin ömrünü uzatmaqdır.
Əminə Bayramova
