BAKI, 31 oktyabr. TELEQRAF
Nyu-York ştatının qubernatoru Keti Hokul federal hökumətin maliyyələşdirməni dayandırması səbəbindən fövqəladə vəziyyət rejimi elan edib.
Teleqraf xarici KİV-lərə istinadən xəbər verir ki, qubernator həmçinin əhaliyə 65 milyon dollarlıq əlavə ərzaq yardımı ayrıldığını açıqlayıb.
Hokul bildirib ki, bu qərar 1 noyabrdan etibarən 3 milyon sakinin federal ərzaq dəstəyindən məhrum qalmasının qarşısını almaq məqsədi daşıyır. Ayrılan vəsait sayəsində təxminən 40 milyon pay yemək ehtiyacı olan ailələrə çatdırılacaq.
ABŞ-də federal hökumətin maliyyələşdirilməməsi səbəbindən 1 oktyabrda hökumət fəaliyyətinin qismən dayandırılması baş verib. Respublikaçılar və demokratlar büdcə xərcləri ilə bağlı razılığa gələ bilmədikləri üçün vəziyyət hələ də davam edir.
