“Pentaqon Amerikanın uzaqmənzilli “Tomaqavk” qanadlı raketlərinin Ukraynaya çatdırılmasını təsdiqləyib”.
Yeniavaz.com xəbər verir ki, bu barədə CNN mənbələrə istinadən məlumat yayıb.
Telekanalın məlumatına görə, Pentaqon çatdırılma ilə bağlı yekun siyasət qərarını Prezident Donald Trampa buraxıb.
Oktyabrın əvvəlində Tramp ABŞ-nin Ukraynaya “Tomaqavk”lar tədarük edə biləcəyinə eyham vurub. Lakin oktyabrın 17-də Ukrayna lideri Volodimir Zelenski ilə görüşü zamanı ABŞ prezidenti bəyan edib ki, o, Kiyevə raketlər verməməyə üstünlük verir, çünki ölkəsini müdafiə etmək üçün lazım olandan əl çəkmək istəmir.
Bundan başqa, telekanalın məlumatına görə, Pentaqon Trampın Zelenski ilə görüşündən əvvəl ehtiyatları qiymətləndirib və tədarükləri təsdiqləyib. Bu qiymətləndirmə ABŞ-nin Avropadakı müttəfiqlərini həvəsləndirib. Buna görə də, bir neçə gün sonra Tramp qəfil mövqeyindən dönəndə Amerika və Avropa rəsmiləri təəccübləndilər. ABŞ lideri özəl olaraq Zelenskiyə deyib ki, Vaşinqton Kiyevə “Tomaqavk” raketlərini verməyəcək – heç olmasa indilik. Ukrayna prezidenti deyib ki, Tramp tədarük məsələsi ilə bağlı “yox” deməyib, lakin bu günə kimi o, “hə” də deməyib.
