Çin Shenzhou-21 missiyası ilə ən gənc astronavtı Vu Fei və dörd qara siçanı Tiangong (Göy Sarayı) Kosmik Stansiyasına göndərib. Siçanlarla kosmosda çoxalma təcrübələri aparılacaq.
Çin Tiangong kosmik stansiyasına yeni ekipaj göndərib. Cümə günü Jiuquan Peyk Buraxılış Mərkəzindən start götürən Shenzhou-21 raketində ölkənin indiyədək ən gənc astronavtı Vu Fei (32 yaş) də yer alıb.
Shenzhou-21 missiyası Çinin 2022-ci ildə tamamlanan daimi kosmik stansiyasına həyata keçirilən yeddinci insanlı uçuş olub. Üç nəfərlik ekipajda komandir Çjan Lu (48) və ilk dəfə kosmosa çıxan Çjan Honcjanq (39) yer alıb. Ekipaj altı aylıq missiyadan sonra Yerə qayıdacaq Shenzhou-20 ekipajının yerini alıb.
Missiya çərçivəsində stansiyaya dörd qara siçan da aparılıb. Bu siçanlar aşağı orbitdə çoxalma ilə bağlı elmi təcrübələrdə istifadə olunacaq. Beləliklə, Çin kosmik stansiyaya ilk dəfə kiçik məməliləri göndərmiş olur.
Shenzhou proqramı son illərdə böyük irəliləyişlər əldə edib. Çin 1990-cı illərdə doğulmuş astronavtlarını göndərərək kosmosda ən gənc nəsli təmsil edən ölkəyə çevrilib. Pekin həmçinin ilk xarici astronavtı — pakistanlı bir şəxsi 2026-cı ildə Tiangong-a göndərməyi planlaşdırır.
Bu sürətli inkişaflar Vaşinqtonda narahatlıq yaradıb. ABŞ Çindən əvvəl Aya astronavt göndərmək üçün işləri sürətləndirir və iki ölkə Ay araşdırmalarında da rəqabət aparır: ABŞ-ın rəhbərlik etdiyi Artemis razılaşmaları Çin və Rusiyanın Beynəlxalq Ay Araşdırma Stansiyası təşəbbüsü ilə qarşı-qarşıyadır.
