Rusiya Daxili İşlər Nazirliyi (DİN) bloger Hüseyn Həsənovu yenidən beynəlxalq axtarışa verib. AzPost RİA Novosti-yə istinadla xəbər verir ki, o, xüsusilə böyük məbləğdə çirkli pulların yuyulmasında təqsirləndirilir.
Nazirliyin məlumat bazasında qeyd olunur: “Həsənov Hüseyn… Axtarış əsası: Cinayət Məcəlləsinin müvafiq maddəsi üzrə axtarışdadır… Təkrar elan edilib.”
Xatırladaq ki, bu ilin yazında Moskva məhkəməsi Həsənov barəsində qiyabi həbs qərarı çıxarmış və o, beynəlxalq axtarışa verilmişdi. Blogerə vəsaitlərin leqallaşdırılması, yəni çirkli pulların yuyulması ittihamı irəli sürülmüşdü.
İstintaqın məlumatına görə, Həsənov 2019–2021-ci illər ərzində 170 milyon rubl məbləğində vergi ödənişindən yayınaraq qanunsuz gəlir əldə edib. O, bu vəsaitin bir hissəsini — təxminən 20 milyon rublu — “qanuni” gəlir kimi göstərərək dövriyyəyə buraxıb.
Ötən il vergi orqanları blogerə qarşı məhkəmə iddiası qaldırmış, onun bank hesabları dondurulmuşdu. İnternet Təhlükəsizliyi Liqasının rəhbəri Yekaterina Mizulina həmin vaxt bildirmişdi ki, Həsənov ölkəni tərk edərək gizlənib.
Lakin elə həmin ilin sentyabrında Federal Vergi Xidməti iddianı geri çəkib və iş bağlanıb. Bu qərarın səbəbləri barədə heç bir açıqlama verməyib.
