İrlandiya hökuməti 3 noyabr tarixindən etibarən ölkəyə gələn ukraynalı qaçqınların dövlət mənzillərində qalma müddətini 90 gündən 30 günə endirib.
Musavat.com xəbər verir ki, bu barədə RTÉ nəşri məlumat yayıb.
Nazirlər Kabineti bildirib ki, hazırkı miqrasiya tempi (təxminən gündə 50 nəfər) davam edərsə, bütün mövcud yaşayış yerləri artıq bu ayın sonuna qədər dolacaq. Jurnalistlərin məlumatına görə, müharibənin başlanmasından bəri İrlandiyaya 120 mindən çox ukraynalı gəlib, onlardan 80 mindən çoxu ölkədə qalıb.
Məqalədə qeyd olunur ki, Kiyevin 18–24 yaşlı kişilərin ölkəni tərk etməsinə icazə verən qanun dəyişikliyindən sonra İrlandiyaya gələn ukraynalıların sayı daha da artıb.
Bundan əlavə, hökumət beynəlxalq müdafiə mərkəzlərində yaşayan və eyni zamanda işləyən sığınacaq axtaranlar üçün həftəlik məcburi ödənişlər tətbiq etmək barədə razılığa gəlib. Ödənişin məbləği gəlirdən asılı olaraq həftədə 15 ilə 238 avro arasında dəyişəcək və bu qərarın bir il ərzində qüvvəyə minməsi gözlənilir.
Lakin bu addımlar hüquq müdafiəçiləri və müxalifət siyasətçiləri tərəfindən sərt tənqid olunub. Qaçqınlara yardım edən “Doras” təşkilatının rəhbəri Con Lennon bildirib ki, dövlət mənzillərində qalma müddətinin azaldılması ukraynalılar arasında evsizlik problemini artıracaq. O həmçinin işləyən sığınacaq axtaranlardan ödəniş alınmasını “son dərəcə ədalətsiz” adlandırıb, çünki “onlar adətən işə getmək üçün yol xərcləri ödəyirlər, lakin uşaqlara görə müavinət ala bilməyən yeganə təbəqədirlər.”
Sinn Fein partiyasının nümayəndəsi Mett Karti xatırladıb ki, hökumət oxşar tədbirləri artıq bir il əvvəl vəd etmişdi, lakin indiyədək beynəlxalq müdafiə axtaranların yerləşdirilməsi xidməti səmərəli şəkildə qurulmayıb.
Sosial-demokrat deputat Sined Gibni isə xüsusilə də Droudada qaçqın qəbul mərkəzinə edilən son hücum fonunda işləyən qaçqınlardan ödəniş tələb olunması ideyasını “şokedici” adlandırıb. Onun sözlərinə görə, “bir çox sığınacaq axtaranlar işləməyə və vergi ödəməyə hazırdırlar, əgər onlara təhlükəsiz və müstəqil yaşamaq imkanı verilsə.”
Xatırladaq ki, 31 oktyabr axşamı Droudada yerləşən qaçqın mərkəzində yanğın baş verib. Binanın yuxarı mərtəbəsindən bir böyüklə birlikdə üç uşaq və bir körpə xilas edilib. Mərkəzdə ümumilikdə 28 nəfər qalırdı. Polis məlumatına görə, yanğın naməlum şəxslərin binaya alışdırılmış fişənglər atmasından sonra baş verib.
Musavat.com
