Azertag portalından əldə olunan məlumata əsasən, ain.az xəbər verir.
Bakı, 5 noyabr, AZƏRTAC
Oreqon Universitetində aparılan yeni araşdırma göstərib ki, isti suya dalmaq (isti vanna qəbul etmək) sağlamlığa əhəmiyyətli faydalar verə bilər. Alimlər bildiriblər ki, isti vannalar qan təzyiqini aşağı salmağa, immunitet sistemini gücləndirməyə və bədənin istilik stresinə uyğunlaşmasını yaxşılaşdırmağa kömək edir.
AZƏRTAC “scitechdaily.com” saytına istinadla xəbər verir ki, Boverman İdman Elm Mərkəzində aparılan tədqiqatda iştirakçılar üç fərqli istilik üsulunu sınaqdan keçiriblər: isti vanna, ənənəvi quru sauna və infraqırmızı sauna. Nəticələrə görə, isti suya dalma bədən istiliyini ən çox artıran və buna görə də ən güclü fizioloji təsir göstərən üsul olub.
Tədqiqatın müəlliflərindən biri, doktorant Cessika Atensio bildirib ki, isti su bədəni havadan daha effektiv şəkildə qızdırır: “Suya batdıqda bədən istiliyi daha tez artır, çünki tərləmə ilə istiliyi bədəndən çıxarmaq çətindir”.
Araşdırma zamanı həmçinin aşkar edilib ki, isti su vannası qan dövranını yaxşılaşdırır, damar sağlamlığına müsbət təsir göstərir və immun sisteminin fəaliyyətini stimullaşdırır.
Layihənin rəhbəri professor Kristofer Minson vurğulayıb ki, isti su terapiyası xüsusilə idman edə bilməyən şəxslər üçün yaxşı bir alternativdir: “İstilik terapiyası təhlükəsiz şəkildə tətbiq olunarsa, sağlamlığın ümumi vəziyyətini yaxşılaşdıra bilər”.
Alimlər, həmçinin qeyd ediblər ki, müntəzəm məşq bədən üçün hələ də ən effektiv üsuldur. Lakin isti vannalar və saunalar məşqi tam əvəz etməsə də, onun faydalarını müəyyən dərəcədə təqlid edə bilir. Araşdırma göstərir ki, isti su vannası təkcə rahatlama vasitəsi deyil, həm də ürək-damar və immun sağlamlığı üçün faydalı bir terapiya üsuludur.
Sonrakı hadisələr barədə daha çox məlumat almaq üçün ain.az saytını izləyin.
