Məhkəmə məktəb rəhbərliyinin səhlənkarlığını təsdiqləyib...
Poliqon xəbər verir ki, ABŞ-ın Virciniya ştatının Nyuport-Nyus şəhərində yerləşən “Ričnek” ibtidai məktəbində 6 yaşlı şagird tərəfindən vurulan keçmiş müəllimə Abigeil Zverner 10 milyon dollar məbləğində təzminat alacaq. Bu barədə NBC News məlumat yayıb.
Hadisə 2023-cü il yanvarın 6-da baş verib. Zverner birinci sinif müəlliməsi işləyərkən, altı yaşlı şagirdi məktəbə gətirdiyi silahdan ona atəş açaraq əlindən və döş qəfəsindən yaralayıb. Məhkəmə qarşısında ifadə verən şahidlər, o cümlədən müəllimənin həmkarları bildiriblər ki, onlar hadisədən əvvəl məktəbin direktor müavini Ebony Parkerə uşağın üzərində silah ola biləcəyi barədə xəbərdarlıq ediblər, lakin o, heç bir tədbir görməyib.
Yeddi nəfərdən ibarət (üç kişi və dörd qadın) münsiflər heyəti qərara gəlib ki, direktor müavini ciddi səhlənkarlıq göstərib və məktəb qaydalarını pozaraq potensial təhlükəyə qarşı reaksiya verməyib. Zvernerin vəkili Kevin Binizian bildirib ki, məktəb protokolları açıq şəkildə göstərir – hər hansı təhlükə barədə məlumat daxil olduqda rəhbərlik dərhal hərəkət etməlidir.
Parkerin vəkili Sandra Duqlas isə müvəkkilinin Zverneri qorumaq üçün “qanuni öhdəliyinin olmadığını” və onun hərəkətsizliyinin “kobud səhlənkarlıq” sayılmayacağını iddia edib.
Qeyd olunur ki, Ebony Parker hazırda uşaq təhlükəsizliyinə etinasızlıq və ağır zorakılıq ittihamları üzrə cinayət məsuliyyətinə cəlb edilib.
Poliqon.info
