Joe Spectorun həyatı və sahibkarlıq fəaliyyəti immiqrantın Amerikada uğur hekayəsinə çevrilməsi baxımından diqqətəlayiq nümunələrdəndir. O, 1980-ci illərin sonlarında Özbəkistanın paytaxtı Daşkənddə anadan olub və uşaqlıqda ailəsi ilə birlikdə ABŞ-a köçüb. Yeni ölkədə dil baryeri, maddi sıxıntılar və sosial adaptasiya çətinlikləri ilə qarşılaşan Spectorun ailəsi bir müddət ərzində ərzaq talonları ilə yaşayıb.
Hakimiyyet.az Valyuta.az-a istinadən xəbər verir ki, bütün bu çətinliklərə baxmayaraq, o, ABŞ-da təhsil alaraq Kaliforniya Universitetinin "Berkeley" kampusunda biznes məktəbini bitirib.
Ali təhsildən sonra Spector investisiya bankçılığı sahəsində, o cümlədən "J.P. Morgan" kimi tanınmış şirkətlərdə işləyib. Lakin bu sahə onun yaradıcı və təşəbbüskar təbiətinə uyğun gəlmədiyi üçün sahibkarlığa yönəlib. 2017-ci ildə o, "Hims" adlı sağlamlıq sahəsində fəaliyyət göstərən və birbaşa müştəriyə yönəlmiş onlayn platformanı təsis edib. Layihənin məqsədi kişi sağlamlığı ilə bağlı həssas mövzuları (məsələn, saç tökülməsi və potensiya problemləri) daha rahat və anonim şəkildə müalicə etmək idi. Daha sonra qadınlar üçün nəzərdə tutulmuş "Hers" brendi də yaradıldı və layihə "Hims & Hers" adı ilə genişləndi.
Brendin uğur qazanmasında onun marketinq strategiyası və istifadəçi dostu interfeysi əsas rol oynayıb. Joe Spectorun fikrincə, güclü marka yaratmaq ucuz başa gəlmir və istifadəçilər bunu dərhal hiss edirlər. O, həmişə fərqli olmağa və sahəsində yeni imkanlar tapmağa üstünlük verib. "Hims & Hers" brendi 9,3 milyard dollarlıq dəyərə çatdıqdan sonra Spector bu layihədən ayrılıb. Onun sözlərinə görə, o, artıq formalaşmış şirkətdə deyil, yeni ideyaları sıfırdan qurmaqda özünü daha təsirli hesab edir.
Spectorun növbəti layihəsi ev heyvanlarının sağlamlığına yönəlmiş "Dutch" platforması oldu. Bu onlayn xidmət istifadəçilərə evlərindən çıxmadan baytarla əlaqə qurmağa və reseptlə yazılmış dərmanların birbaşa ünvana çatdırılmasına imkan yaradır. ABŞ-da 200 milyondan çox ev heyvanı sahibinin olduğu bir şəraitdə Spector bu sahədə ciddi inkişaf potensialı olduğunu düşünür.
O, sahibkarlıq yolunda çoxsaylı uğursuzluqlarla qarşılaşdığını, lakin heç vaxt dayanmadığını deyir. Hər uğursuzluqdan dərs çıxarıb, yeni yanaşmalar axtarmağa davam edib. Onun fikrincə, bir ideyanın uğura çatması üçün yalnız məhsul deyil, həm də marka dəyəri və şirkət mədəniyyəti vacibdir.
Joe Spectorun hekayəsi təkcə maddi nailiyyətlərlə yox, həm də ideya yaradıcılığı, yenilikçilik və məqsədyönlülüklə seçilir. O, sahibkarlığı gəlir mənbəyi kimi deyil, cəmiyyətə müsbət təsir vasitəsi kimi görür.
