Vətəninfo.az Mehr agentliyinə istinadən xəbər verir ki, İran İslam İnqilabı Keşikçiləri Korpusunun (SEPAH) Aerokosmik Qüvvələrinin mütəxəssisləri çərşənbə axşamı keçirilən hərbi nailiyyətlər sərgisi zamanı “Şahed 161” adlı yeni pilotsuz uçuş aparatını uğurla sınaqdan keçiriblər.
Məlumata əsasən, “Şahed 161” SEPAH-ın aerokosmik sahədə əldə etdiyi mühüm texnoloji nailiyyətlərdən biridir və müxtəlif hərbi missiyaları yerinə yetirmək qabiliyyətinə malikdir.
Yeni nəsil pilotsuz təyyarə 150 kilometrə qədər uçuş məsafəsinə, 170 kiloqram uçuş çəkisinə, 26 min fut uçuş hündürlüyünə və 135 km/saat maksimal sürətə malikdir. Onun havada qalma müddəti 2 saat təşkil edir.
İran istehsalı olan bu PUA əsasən kəşfiyyat və müşahidə məqsədləri üçün nəzərdə tutulub. Aparat avtomobil əsaslı buraxılış qurğusu vasitəsilə havaya qalxır, həmçinin optik avadanlıq və 50 kiloqrama qədər iki bomba daşımaq imkanına malikdir.
Sınaq, İslam İnqilabı Keşikçiləri Korpusunun Aerokosmik Milli Parkında təşkil olunan sərgi çərçivəsində həyata keçirilib. Tədbirdə SEPAH-ın müxtəlif aerokosmik layihə və texnoloji yenilikləri də nümayiş etdirilib.
