Ermənistanın Baş naziri Nikol Paşinyan "Po-Naşemu" ("Bizim yol") hərəkatının koordinatoru Narek Karapetyanla məşhur amerikalı jurnalist Taker Karlson arasında keçirilən müsahibədən sonra ABŞ-da ona qarşı mənfi münasibətin yarandığına inanır. Buna görə də o, mətbuat katibi Nazeli Baqdasaryan və xarici işlər naziri Ararat Mirzoyana məşhur "Time"ın jurnalisti Saymon Şusterlə revanş müsahibəsi təşkil etməyi tapşırıb.
Modern.az xəbər verir ki, bu barədə mövzunu araşdıran "Hraparak" nəşri məlumat yayıb.
"Paşinyan Karapetyanın Taker Karlsonla müsahibəsinin nəticələrindən son dərəcə narazı idi. Xatırladaq ki, dünən prezidentin Trampın oğlu 12 noyabrda planlaşdırılan Ermənistan səfərini ləğv edib.
Narek Karapetyanın müsahibəsinin kilsənin təqib olunması barədə məlumatlar yayılmasında rol oynaması və bunun da Trampın Ermənistana səfərini ləğv etməyə məcbur etməsi mümkündür. Paşinyan beynəlxalq ictimaiyyəti müxalifətə qarşı mübarizəsinin legitimliyinə inandırmaq istəyir və bu yay müxalifətin və kilsə nümayəndələrinin hakimiyyəti zorla ələ keçirməyə cəhd etməsi ilə bağlı faktları Amerika platformasında təqdim etmək qərarına gəlib. Bundan əlavə, o, "Time" jurnalının "İlin adamı" namizədləri siyahısına daxil olmağa ümid edir. O bunun Ermənistan ictimaiyyəti qarşısında nüfuzunu artıracağına inanır.
Simon Şuster əvvəllər mərhum Rusiya müxalifətçi siyasətçisi Aleksey Navalnı, Ukrayna prezidenti Vladimir Zelenski və Belarus prezidenti Aleksandr Lukaşenko ilə müsahibələr aparıb", - deyə nəşr qeyd edib.
