Musavat.com xəbər verir ki, ABŞ dövlət katibi Marko Rubio Macarıstanın Rusiya neft və qazı ilə bağlı Amerika sanksiyalarından bir illik müddətə azad edildiyini açıqlayıb. Onun sözlərinə görə, Budapeştin dərhal enerji xətlərindən ayrılması ölkə iqtisadiyyatı üçün “son dərəcə travmatik” olardı.
Lakin Macarıstan rəsmiləri bu məlumatı şübhə altına alır və bildirirlər ki, istisna müddəti ABŞ-ın deyil, siyasi razılaşmanın şərtləri ilə müəyyən olunub. Telex-in yazdığına görə, Budapeşt hesab edir ki, istisna Viktor Orban baş nazir, Donald Tramp isə ABŞ prezidenti olduğu müddətcə qüvvədə qalacaq.
Macarıstanın xarici işlər naziri Peter Siyyarto qeyd edib ki, razılaşma ilkin olaraq şifahi formada olub və hazırda onu yazılı sənədə çevirmək üçün texniki danışıqlar davam edir.
Baş nazir aparatının rəhbəri Gerqey Quyaş isə bildirib ki, “ABŞ Dövlət Departamentindən bu cür məlumatların gəlməsi mümkün olsa da, danışıqlar zamanı bir illik müddət barədə heç bir fikir səslənməyib” və Siyyartonun yaxın günlərdə Rubio ilə məsələni dəqiqləşdirmək üçün əlaqə saxlayacağı gözlənilir.
Məlumatlara görə, məsələ iki tərəf arasında hələ də tam razılaşdırılmayıb və müxtəlif şərhlər fonunda siyasi gərginlik davam edir.
Musavat.com
