Son illərdə sosial mediada məşhurlaşan "yatarkən ağzı yapışdırmaq" trendinin kökləri əslində min illər əvvələ gedib çıxır. Xoruldamağın azalması, ağız quruluğunun qarşısının alınması və yuxu keyfiyyətinin yaxşılaşdırılması üçün istifadə edilən bu üsul Koreyada da geniş yayılıb.
Milli.Az xəbər verir ki, mütəxəssislər bildirirlər ki, ağız bantlama üsulunun birbaşa tarixi qeydə alınmasa da, burunla nəfəs almanın əhəmiyyəti həm yoqa, həm də qədim Çin təbabətində əsas prinsip kimi qəbul olunub. Bu ənənələrdə burun nəfəsi bədəni sakitləşdirmək, enerji axınını tənzimləmək və sağlamlığı qorumaq üçün vacib hesab edilirdi.
Ağızdan nəfəs almanın sağlamlığa təsiri ilk dəfə 1800-cü illərdə tibbi mənbələrdə qeyd olunub. Amerikalı rəssam-tədqiqatçı Corc Catlin yerli Amerika qəbilələrində burun nəfəsinin daha sağlam həyat tərzinə gətirib çıxardığını müşahidə edərək 1869-cu ildə "Ağzını bağla və həyatını xilas et" kitabını yazmışdı. Bu fikir müasir ağız bantlamanın ilkin forması hesab olunur.
1900-cü illərin əvvəllərində ortodontistlər və pediatrlar ağızdan nəfəs alan uşaqlarda diş qüsurları, dar çənə və üz quruluşu dəyişiklikləri kimi problemlərin daha çox müşahidə olunduğunu qeyd ediblər. Bu tapıntılar burun nəfəsini təşviq edən təcrübələrin yayılmasına təkan verib.
1950-ci illərdə rus həkimi Konstantin Buteyko nəfəs darlığı və tənəffüs pozğunluqları ilə bağlı araşdırmaları ilə burun nəfəsinin əhəmiyyətini yenidən gündəmə gətirib. Onun metodunda gecə ağız örtüklərindən istifadə də yer alırdı. Bu mərhələ müasir tibbi ağız bantlarının yaradılması üçün əsas sayılır.
Son illər biohacking və yuxu gigiyenasına artan maraq səbəbindən ağız bantlama yenidən trendə çevrilib. Ceyms Nestorun 2020-ci ildə yayımlanan "Nəfəs" kitabı da bu texnikanın qlobal populyarlığını artırıb. Sosial mediada yayılan videolar və idmançıların nəfəs məşqlərinə diqqət göstərməsi üsulun daha da məşhurlaşmasına səbəb olub.
Fidan
Milli.Az
