Əfqanıstanın xarici işlər naziri Əmirxan Möttəkinin ötən ay Hindistana səfəri Pakistanda gərginliyə səbəb olub. Əfqanıstanın Amerika işğalı zamanı üsyançıları dəstəkləməkdə ittihamlanan İslamabad administrasiyası, “Taliban”ın özünün əzəli düşməni Hindistanla birləşərək onlara xəyanət etdiyinə inanır.
Hafta.az-ın yazdığına görə, lakin Yeni Dehli uzun müddətdir Pakistanın vəkil təşkilatı kimi gördüyü “Taliban”la münasibətlərini düzəltməkdən məmnundur.
Möttəkinin səfərini xatırladan “New York Times”, 1947-ci ildə Hindistanın bölünməsindən sonra Pakistanda çoxsaylı Diyubəndi məktəblərinin yaradıldığını vurğulayıb.
O, regiondakı radikal təşkilatların Sovet İttifaqının Əfqanıstana hücumunun qarşısını almaq üçün çalışan Mərkəzi Kəşfiyyat İdarəsi və Səudiyyə Ərəbistanı tərəfindən dəstəkləndiyini, bu qrupların sonradan “Taliban”ı yaratdığını qeyd edib.
Bu mirasın Pakistanla Əfqanıstan arasında problemlərə səbəb olduğu bildirilir.
Vilyams Kollecində antropologiya dərsi verən Devid B. Edvards Pakistan hərbi kəşfiyyat agentliyinə işarə edərək deyib: "Onlar öz Frankenşteynlərini yaratdılar və onu idarə edə biləcəklərini düşündülər".
Edvards iki ölkə arasındakı sərhədin Əfqanıstan tərəfindən qəbul edilmədiyini və puştun millətçiliyinin bölgədəki təsirini artırdığını bildirib.
Oktyabrın 9-da Möttəki Hindistana gəldikdən sonra Əfqanıstanın paytaxtı Kabildə partlayışlar eşidilib. “Taliban” hücumlara görə Pakistanı günahlandırıb.
İslamabad hökuməti hücumlara görə məsuliyyəti rədd etsə də, Əfqanıstanın "Pakistana qarşı terror hücumları üçün baza" kimi istifadə edildiyini bildirib.
Daha sonra Möttəkinin Hindistana bir həftəlik səfəri boyunca iki ölkə arasındakı sərhəddə toqquşmalar davam edib.
Pakistan hökuməti iddia edir ki, Əfqanıstan “Təhriki Taliban Pakistan” (TTP) və digər təşkilatlara sığınacaq verir. İslamabad bildirir ki, terror təşkilatı kimi təsnif etdiyi və ərazisində çoxsaylı hərəkətlər həyata keçirən TTP Əfqanıstanda yerləşir, Kabil administrasiyası isə təşkilata qarşı tədbirlər görməyib.
Ötən həftə baş verən terror hücumlarından sonra Pakistanın müdafiə naziri Xavaca Məhəmməd Asif Əfqanıstana sərhəddən əməliyyat ehtimalının istisna edilə bilməyəcəyini qeyd edib.
Asif Hindistan və Əfqanıstana xəbərdarlıq edərək deyib: "Pakistan heç vaxt hərbi əməliyyata başlamayacaq, amma biz heç bir hücumu cavabsız qoymayacağıq və qətiyyətlə cavab verəcəyik".
“Taliban” rəsmiləri TTP-ni dəstəkləmədiklərinə israr edirlər.
Bu arada, Kabil administrasiyası Pakistanı ABŞ-ın kuklası olmaqda ittihamlayıb.
Ötən ay etdiyi çıxışında Əfqanıstan daxili işlər nazirinin müavini Məhəmməd Nəbi Öməri hətta İslamabadı qorxutmağa çalışıb: "Onların təyyarələri və tankları ola bilər, amma bizim cihadın bərpa olunmasını istəyən döyüşçülərimiz var"...
