Deputat Elşən Musayev Milli Məclisin bu gün keçirilən plenar iclasında “2026-cı il dövlət büdcəsi haqqında” qanun layihəsinin I oxunuş üzrə müzakirəsində çıxış edərək büdcənin sosial, iqtisadi və təhlükəsizlik aspektlərini şərh edib.
"Operativ Məlumat Mərkəzi-OMM"-in xəbərinə görə, deputat bildirib ki, azad edilmiş torpaqlarda bərpa və yenidənqurma prosesi artıq geniş vüsət alıb. Bu ərazilərdə minalardan təmizləmə, təhlükəsiz infrastrukturun qorunması, polis və fövqəladə xidmətlərin formalaşdırılması davam edir:
“Hər bir qayıdan vətəndaşın təhlükəsizliyi dövlətin bir nömrəli vəzifəsidir və bu yalnız kifayət qədər maliyyə dəstəyi ilə mümkündür”, – deyə Musayev vurğulayıb.
O qeyd edib ki, 2026-cı ilin təhlükəsizlik büdcəsinin artırılması kibertəhlükəsizlik, sərhəd mühafizəsi, xüsusi xidmət orqanlarının texniki təchizatı, daxili təhlükəsizlik və fövqəladə hallar sistemlərinin gücləndirilməsi üçün hüquqi və maliyyə bazası yaradacaq. NATO standartlarına uyğun hərbi birləşmələrin yenidən qurulması və təlimlərin keçirilməsi üçün də vəsait ayrılır.
Deputat həmçinin büdcənin sosial və iqtisadi aspektlərinə diqqət çəkib:
“2026-cı ilin büdcəsi sosial sahələri, müdafiə-təhlükəsizlik, təhsil, səhiyyə, mədəniyyət, əhalinin sosial müdafiəsi və aqrar sahəni əhatə edir. Ümumiləşdirsək, cəmiyyətin hərtərəfli inkişafına dəstək verir. Qeyri-neft-qaz sektorunun payı 57,4%-ə çatacaq və gəlirlərin 57,4%-i, vergilərin isə 78,7%-i qeyri-neft-qaz mənbələri hesabına formalaşacaq”, – deyə o bildirib.
Afət Ziyadqızı
