Stomatoloqların ştatının ləğv edilməsi ilə bağlı məsələ 8 ay əvvəl olmuşdu və onlara bu barədə ciddi xəbərdarlıq edilmişdi. Bildirilmişdi ki, keyfiyyətin artırılması ilə bağlı ciddi işlər həyata keçirsinlər. Biz ilin əvvəlindən təhlillər həyata keçirmişik, buna görə də əlimizdə stomatoloqların xidmət səviyyəsi ilə bağlı faktlar var idi. O dövrdən bugünədək stomatoloqların fəaliyyətini dəyərləndirdik. Elə tibb müəssiələri var ki, oraya bir il ərzində 1 nəfər belə stomatoloji xidmət üçün müraciət etmir.
Deməli, vətəndaş bu xidmətin keyfiyyətindən məmnun deyil. Çünki stomatologiya ən çox müraciət olunan sahələrdən biridir. Əgər müraciət yoxdursa, deməli, xidmətin səviyyəsi qənaətbəxş deyil.
Xezerxeber.az xəbər verir ki, bunu Tibbi Ərazi Bölmələrini İdarəetmə Birliyinin (TƏBİB) icraçı direktoru Vüqar Qurbanov Yeni Klinikada Yeni Robotik Reabilitasiya və Hematologiya - Sümük İliyi Transplantasiyası mərkəzlərinin açılışına dair keçirilən brifinqdə deyib.
Vüqar Qurbanov qeyd edib ki, vacib məsələ vətəndaşın aldığı tibbi xidmətin keyfiyyətindən məmnun qalmasıdır: “Bununla bağlı TƏBİB ciddi islahatlar həyata keçirəcək. Stomatoloqlarla bağlı araşdırma davam edir. Nəinki stomatoloq, digər həkimlərin fəaliyyəti ilə bağlı da araşdırma gedir və son nəticələrlə bağlı məlumat veriləcək. Regionlardakı bəzi tibb müəssisələrinə artıq stomatoloqların ştatlarının ləğv olunması ilə bağlı xəbərdarlıq göndərilib”.
