Azər Həsrət: “Dövlət qurumları mətbuatı ittiham etməzdən öncə operativ informasiya təminatını gerçəkləşdirməlidir”
Son günlər TƏBİB-in İlkin Səhiyyə Xidməti Departamentinin rəhbəri Rəşad Çobanlının tibbi təhsilə malik olmadığı ilə bağlı sosial şəbəkədə, mediada məlumatlar yayıldı.
Məlumatlara əsasən, Rəşad Çobanlı 2010–2015-ci illərdə peşəkar həkimliklə əlaqəsi olmayan, əvvəllər “sanfak” (sanitarlıq fakültəsi) kimi tanınan ixtisas üzrə təhsil alıb. O, daha sonra “Linkedin” platformasında BDU-da magistr təhsilini tibb sahəsi üzrə davam etdirdiyini qeyd edib. Lakin bu, onun ən kritik səhiyyə strukturlarından birinə rəhbərlik etməsi üçün zəruri olan tibbi ixtisaslaşmanı əvəz etmir. Demək olar ki, bu məlumat bir neçə gün sosial mediada yayıldı və rəsmi açıqlama verilmədi. Ancaq dünən (20 noyabr) TƏBİB-in İcraçı direktoru Vüqar Qurbanov keçirilən brifinqdə deyib ki, TƏBİB daxilində ali təhsili olmayan əməkdaşımız yoxdur: “Son günlər mediada bir əməkdaşımız haqqında yayılan xəbərlə bağlı bildirmək istəyirəm ki, həmin şəxs ATU-nun Tibbi profilaktika fakültəsini bitirib. Diplomunda həkim yazılıb. Səhiyyənin idarə olunması ilə bağlı magistr dərəcəsi alıb”.
Qeyd edək ki, bu kimi məlumatlar zamanla tez-tez ictimailəşir.Rəşad Çobanlı haqqında da məlum məlumat sosial mediada bir həftə müxtəlif formada işıqlandırıldı. Olmazdı ki, məlumat yayılan günü xəbərin yanlış və ya həqiqət olması haqqındadərhal məlumat verilsin, bir həftə sonra yox?
“Mediada kiminləsə, hansısa qurumla bağlı məlumat yayılırsa,dərhal buna aydınlıq gətirilməlidir”
Media eksperti Azər Həsrət “Bakı-Xəbər”ə açıqlamasında qeyd etdi ki, bu tip məlumatı yayan jurnalistlər ilk olaraq adıçəkilən şəxslə əlaqə saxlayıb, məlumatı dəqiqləşdirməli idi: “Ola bilər ki, şəxs ona ünvanlanan suallara cavab verməyib. Belə olan halda ortada olan boşluğun doldurulması işini aidiyyəti qurum - TƏBİB dərhal üzərinə götürməli idi. Ümumiyyətlə, bu kimi hallar ilk dəfə deyil ki, qeydə alınır. Hansısa məsələ ilə bağlı məlumat yayılır, geniş müzakirə, təhlil olunur. Bundan neçə gün sonra nümayəndə ortaya çıxıb mətbuatı ittiham etməyə başlayır. Dövlət qurumları mətbuatı ittiham etməzdən öncə operativ informasiya təminatını gerçəkləşdirməlidir. Mediada kiminləsə, hansısa qurumla bağlı məlumat yayılırsa,dərhal buna aydınlıq gətirilməlidir. Əslində bu cür xəbərləri yayanların niyyəti qara, pis deyil. Onların məqsədi sözügedən şəxsi gözdən salmaq deyil. Sadəcə olaraq jurnalistlər qarşı tərəflə əlaqə yarada bilmir. Bu səbəbdən də media sektorunu günahlandırmaq düzgün deyil”.
Leyla QARAXANLI
