“Real”ın hücumçusu Vinisius Junior klub rəhbərliyinə gələcəyi ilə bağlı mövqeyini çatdırıb.
90deqiqe.Az-ın "The Athletic"ə istinadən məlumatına görə, durumla tanış üç mənbənin təsdiqlədiyi kimi, ötən ayın sonunda Vinisius klub prezidenti Florentino Pereslə söhbət zamanı müqaviləni uzatmaq istəmədiyini bildirib. O, qeyd edib ki, baş məşqçi Xabi Alonso ilə münasibətlər gərgin olaraq qaldığı müddətdə yeni sözləşmə imzalamağa hazır deyil.
Məlumatda vurğulanır ki, Vinisius bu mövqeyini “el-klasiko”dan sonra açıqlayıb. Həmin qarşılaşmada braziliyalı futbolçu əvəzlənməsinə əsəbi reaksiya göstərmiş və daha sonra Pereslə görüşərək hazırkı münasibətlər fonunda müqavilənin uzadılmasını doğru addım hesab etmədiyini deyib.
Daha əvvəl “Real” və Vinisius Junior arasında aparılan danışıqlar maliyyə məsələləri ilə bağlı fikir ayrılığı səbəbindən dalana dirənmişdi.
Qeyd edək ki, Vinisiusun Madrid klubu ilə mövcud müqaviləsi 2026/2027 mövsümünün sonuna qədər qüvvədədir.
