Milli Məclisin bu gün keçirilən plenar iclasında deputat Vüqar Bayramov “Dövlət qulluğu haqqında” qanuna dəyişikliklərə münasibət bildirib.
"Operativ Məlumat Mərkəzi-OMM"-in xəbərinə görə, o qeyd edib ki, qanun layihəsi 28.1-ci maddədə – dövlət qulluğuna qəbul prosedurlarında dəyişiklikləri özündə ehtiva edir və əsas məqsəd qəbulun asanlaşdırılmasıdır.
Deputat vurğulayıb ki, hazırda 27,4 min vətəndaş dövlət qulluğunda çalışır və onların təxminən 30 faizi qadınlardır. Bu dəyişikliklər vətəndaşların dövlət qulluğuna marağını artıracaq və işə qəbul prosesini sadələşdirəcək.
Vüqar Bayramov iki təklif irəli sürüb. Birinci təklifdə dövlət qulluğunun birinci və üçüncü təsnifatının siyahısının genişləndirilməsinə diqqət çəkilib. Deputat bildirib ki, hazırda dövlət qulluğunda çalışanların cəmi 7,4 faizi bu təsnifata daxildir, qalan 92,6 faizi isə digər təsnifatlarda çalışır. Təsnifatın genişləndirilməsi daha çox vətəndaşın asan prosedurla dövlət qulluğuna qəbuluna imkan yaradacaq.
İkinci təklifdə iş stajı müddətinə diqqət yetirilib. Hazırda dövlət qulluğunda çalışanların 54 faizi 10 ildən az iş stajına malikdir. Bayramov bildirib ki, 10 ildən çox staj tələb edən qaydaların nəzərdən keçirilməsi gənc vətəndaşların dövlət qulluğuna cəlb olunmasını asanlaşdıracaq və dövlət qulluğunda gənclərin təmsilçiliyini artıracaq.
Deputat əlavə edib ki, bu dəyişikliklər həm proseduraları sadələşdirəcək, həm də gənc kadrların dövlət qulluğuna daha rahat inteqrasiyasına imkan verəcək.
Mehman Mirzəzadə
