Milli Məclisin bu gün keçirilən plenar iclasında deputat Rəşad Mahmudov səhiyyə sistemində kadr çatışmazlığı və xaricdə təhsil almış həkimlərin Azərbaycanda fəaliyyət imkanları məsələsinə toxunub.
"Operativ Məlumat Mərkəzi-OMM"-in xəbərinə görə, deputat bildirib ki, xüsusilə MDB ölkələrində tibb təhsili və klinik ixtisaslaşma almış həkimlərin ölkəmizdə fəaliyyətə başlaması hələ də çətinliklərlə üzləşir.
“Yeni rezidentura proqramının tətbiqindən sonra bəzi həkimlərin Azərbaycanda işləməsi demək olar ki, mümkün deyil. Bu, texniki məsələ kimi görünə bilər, lakin həm insan hüquqları, həm ölkənin səhiyyə ehtiyacları, həm də beynəlxalq öhdəliklər baxımından vacibdir”, – deyə Mahmudov vurğulayıb.
O qeyd edib ki, bir çox həkimlər Azərbaycan vətəndaşları və ya azərbaycanlı kökənli MDB ölkələrinin vətəndaşlarıdır, Azərbaycan dilini bilirlər və yüksək səviyyəli klinikalarda təhsil alıblar. Deputat əlavə edib ki, Avropanın bir çox ölkələri xaricdə təhsil almış həkimləri sadəcə imtahan, test və adaptasiya mərhələlərindən keçirərək sistemlərinə daxil edirlər, halbuki Azərbaycanda bu mexanizmin tətbiqi hələ yetərli deyil.
Rəşad Mahmudov bildirib ki, regionlarda ixtisaslı kadr çatışmazlığı mövcuddur və hazır, dil baryeri olmayan həkim resurslarından istifadə olunmur. Deputat vurğulayıb ki, Azərbaycanın Lissabon Konvensiyası və MDB ölkələri ilə qarşılıqlı tanınma qaydalarına əsasən diplomların tanınması açıq şəkildə təmin olunmalıdır və imtahan, adaptasiya hüququ təmin edilməlidir.
Mahmudov diqqətə çatdırıb ki, məsələ siyasi deyil, texniki xarakterlidir və şəffaf mexanizm yaradılaraq ölkənin insan kapitalına və səhiyyə sisteminin ehtiyaclarına xidmət edilə bilər.
Mehman Mirzəzadə
