Bakı, 25 noyabr, Səbinə Əlizadə, AZƏRTAC
Gender bərabərliyi və qadınların iş imkanlarının artırılması istiqamətində Azərbaycanla əməkdaşlığımız genişlənir.
Bunu AZƏRTAC-a açıqlamasında Meksikanın ölkəmizdəki səfiri xanım Mariya Viktoriya Romero Kabalyero deyib.
Diplomat ölkəsində gender bərabərliyinin və qadınların hüquqlarının müdafiəsinin prioritet istiqamətlərdən biri olduğunu vurğulayıb.
Meksika səfirliyi tərəfindən ispan dilinə tərcümə olunmuş “Qadınlara Dəstək Xətti” broşüründən də söz açan səfir qeyd edib ki, broşürün tərcüməsi Azərbaycanda yaşayan ispandilli icma üçün məlumatların əlçatanlığını artırmaq və müraciət imkanlarını genişləndirmək baxımından vacib addımdır.
Səfir Azərbaycanda müxtəlif sahələrdə uğur qazanan, öz biznesini quran, cəmiyyətdə fəal rol oynayan çoxsaylı azərbaycanlı qadınlarla tanış olduğunu da vurğulayıb.
O, qadınlara qarşı zorakılıq halları ilə mübarizənin önəmini diqqətə çatdıraraq deyib: “Bu problem bir ölkəyə və ya bir cəmiyyətə aid deyil. Əsas məqam səyləri birləşdirmək, institusional əməkdaşlığı gücləndirmək və qadınların özlərini daha təhlükəsiz hiss etmələrinə şərait yaratmaqdır. Bu gün biz dövlət qurumu, QHT və özəl sektor nümayəndələri ilə birgə fəaliyyət göstəririk. Belə üçtərəfli əməkdaşlıq mexanizmləri sosial sahədə mühüm nəticələr əldə etməyə imkan verir”.
“Qadınların iş imkanlarının artırılması və gender bərabərliyi üzrə fəaliyyətimizi bundan sonra daha da genişləndirməyə hazırıq. Hesab edirəm ki, bu təşəbbüs gələcəkdə daha böyük layihələr üçün möhkəm zəmin yaradacaq”, – deyə səfir əlavə edib.
