Naxçıvan, 25 noyabr, AZƏRTAC
Bu gün Naxçıvan şəhərində keçirilən həmrəylik forumu çərçivəsində Türk Dövlətləri Təşkilatına (TDT) üzv və müşahidəçi ölkələrin qeyri-hökumət təşkilatlarını birləşdirən yeni platforma təsis olunub. 2009-cu ildə Naxçıvanda Türk dünyasının tarixində yeni bir səhifə yazılmışdı, 2025-ci il noyabrın 25-də də burada yenidən tarixi hadisə baş verir.
Bu sözləri AZƏRTAC-ın bölgə müxbirinə müsahibəsində Milli Məclisin deputatı, Türk Dövlətləri Təşkilatına üzv ölkələrin QHT-lərinin Platformasının sədri Azər Allahverənov bildirib.
O deyib: "Bu gün Naxçıvanda Türk dünyasını daha da birləşdirəcək, xüsusilə vətəndaş cəmiyyətləri arasında əlaqələri gücləndirəcək mühüm bir platforma təsis olundu. TDT çərçivəsində mövcud olan 34 platformanın sırasına bu gündən etibarən 35-ci platforma da daxil edildi. Təşkilata üzv və müşahidəçi statusunda olan 8 ölkə bu təşəbbüsü dəstəklədi".
Qeyd edək ki, bu gün Naxçıvanda Türk Dövlətləri Təşkilatına üzv ölkələrin QHT-lərinin Platforması təsis olunub. Forumun qərarına əsasən, Platformanın sədri Azərbaycan Respublikası Milli Məclisinin deputatı Azər Allahverənov seçilib.
