HƏMAS siyasi partiyaya çevrilməyi müzakirə edir
Ajans.az xəbər verir ki,bu barədə ərəb qəzeti “Əşarq əl-Əvsat” məlumatlı mənbələrə istinadən xəbər yayıb. Mənbələrin bildirdiyinə görə, bir neçə HƏMAS lideri hərəkatın “mövcud siyasi qüvvələrə bənzər şəkildə formalaşacaq siyasi partiya” kimi təşkilatlanmasını təklif edən sənəd təqdim edib. Sənəddə bu strukturu siyasi, iqtisadi və sosial sahələrdə fəaliyyət göstərə bilən bir quruma çevirmək ideyası yer alıb. Məlumata əsasən, təklif sənədi hərəkatın siyasi bürosuna, Şura Şurasına (məsləhət orqanı), ali rəhbərlik şurasına və HƏMAS-ın digər əsas strukturlarına göndərilib. Sənəddə həmçinin “hərtərəfli Fələstin barışığı”nın təmin edilməsi vurğulanır və HƏMAS-ın Fələstin Azadlıq Təşkilatına qoşulması, eləcə də onun islahat prosesində iştirak etməsi təklif olunur. Bu təşəbbüsün, Qəzza müharibəsindən sonra regionda formalaşan yeni reallıqlar fonunda hərəkatın tədricən siyasi fəaliyyətə keçidini təmin etmək və eyni zamanda öz fundamental prinsiplərinə sadiqliyini qorumaq məqsədi daşıdığı bildirilir.
