Bakı, 26 noyabr, AZƏRTAC
Türk Dövlətləri Təşkilatına (TDT) üzv ölkələrin qeyri-hökumət təşkilatlarının ilk dəfə keçirilən həmrəylik forumu mühüm əhəmiyyətə malikdir. Bu təşəbbüsə ən yüksək qiyməti isə Prezident İlham Əliyev verib. Dövlətimizin başçısının həmrəylik forumunun iştirakçılarına müraciətində vurğulanıb ki, türk dövlətlərinin artan potensialı və qlobal müstəvidə gündən-günə güclənən mövqeyi daha iddialı məqsədlərin qarşıya qoyulmasını, bütün sahələrdə əməkdaşlığın dərinləşdirilməsini zəruri edir. Forum isə bu istiqamətdə atılmış mühüm addımdır.
Bu sözləri AZƏRTAC-a açıqlamasında Vətəndaşların Əmək Hüquqları Liqasının sədri, hüquq müdafiəçisi Sahib Məmmədov deyib.
Cəmiyyətin aparıcı təsisatlarından olan qeyri-hökumət təşkilatlarının da bu prosesə fəal şəkildə qoşulduğunu qeyd edən Sahib Məmmədov tədbirdə müzakirə olunan mövzuların müxtəlif sahələri əhatə etdiyini vurğulayıb. Bildirib ki, Bakıda keçirilən forumda “Zəngəzur dəhlizi: türk coğrafiyasını birləşdirən körpü” adlı panel sessiya, həmçinin Naxçıvanda Türk Dövlətləri Təşkilatına üzv ölkələrin QHT Platformasının təsis konfransı keçirilib. Forumun daimi orqanları yaradılıb və baş katibi seçilib.
Hüquq müdafiəçisi, həmçinin bu yeni Platformanın dövlət hakimiyyət orqanları ilə yanaşı, öz mandatı çərçivəsində TDT-nin möhkəmlənməsinə, dövlətlər və xalqlar arasında əməkdaşlığın, dostluğun və qardaşlığın daha da dərinləşməsinə əhəmiyyətli töhfə verəcəyinə əminliyini ifadə edib.
