2026-cı ildən Xidmətlər Zərfinə ürək-damar, neyrocərrahiyyə, ümumi cərrahiyyə, uroloji, oftalmoloji, travmatoloji və laborator xidmətlərlə bağlı yeni tibbi xidmətlərin əlavə edilməsi, mövcud xidmətlərin çeşidinin artırılması planlaşdırılır.
Bu barədə Musavat.com-a İcbari Tibbi Sığorta üzrə Dövlət Agentliyindən bildirilib.
Qeyd olunub ki, bunlar arasında kəsiksiz damar əməliyyatları, travmatoloji müdaxilələr, qarın boşluğu, baş-beyin və göz əməliyyatları kimi mürəkkəb cərrahi müdaxilələr yer alır.
“Eyni zamanda, gələn ildən ambulator şəraitdə resept əsasında yazılan dərman vasitələrinin mərhələli şəkildə icbari tibbi sığorta hesabına qarşılanması planlaşdırılır. İlk mərhələdə ürək-damar sistemi xəstəlikləri üzrə dərman vasitələri Xidmətlər Zərfinə daxil ediləcək.
Qeyd edək ki, Nazirlər Kabineti əhalinin dərman vasitələri ilə təminatının yaxşılaşdırılması, tibbi sığorta sistemində şəffaflığın və maliyyə dayanıqlığının artırılması məqsədilə dərman təminatının tənzimlənməsinə dair bir sıra qərarlar qəbul edib. Bu qərarlarla dərman vasitələrinin icbari tibbi sığorta hesabına kompensasiya mexanizmi, onların Xidmətlər Zərfinə daxil edilməsi və çıxarılması meyarları müəyyənləşdirilib.
Hazırda pozitiv siyahı hazırlanır. Bu siyahıya ürək-damar xəstəliklərində istifadə olunan antihipertenziv dərmanlar daxil ediləcək. Siyahı təsdiq olunduqdan sonra bütün dərmanlarla bağlı məlumatlar-təsiredici maddə, dozalar, tətbiq edilən xəstəliklər və kompensasiya dərəcələri rəsmi saytda yerləşdiriləcək və siyahı hər rüb yenilənəcək.
Dərmanlar elektron resept vasitəsilə təyin olunacaq. Elektron reseptlər vasitəsilə təyin olunmuş dərman vasitələrini pasiyentlər Agentliklə müqaviləsi olan özəl apteklərdən ala biləcəklər. Bu özəl apteklər xüsusi loqolarla işarələnəcək ki, vətəndaşlar apteki rahatlıqla tapa bilsinlər.
Hazırda icbari tibbi sığorta hesabına dərmanların ambulator şəraitdə qarşılanması istiqamətində zəruri hazırlıq işləri-elektron reseptlərin icbari tibbi sığortanın məlumat bazası ilə inteqrasiyası, apteklərlə əməkdaşlıq mexanizmlərinin qurulması və hesabatlılığın təmin olunması həyata keçirilir”, deyə açıqlamada bildirilib.
Qeyd edək ki, TƏBİB-in İcraçı direktoru Vüqar Qurbanov bir neçə gün öncə keçirilən brifinqdə gələn il icbari tibbi sığorta zərfinə daxil olan bəzi xidmətlərin təminata alınmayacağı ehtimalı olduğunu bildirib. “Bununla bağlı məlumat il sonuna doğru dəqiqləşəcək”, deyə qurumun rəhbəri deyib.
V.Qurbanov vurğulayıb ki, bununla da ölkədə sığortalı və sığortalı olmayan hissə yaranacaq. “Sığortalı olmayan hissə sığorta haqqını ödədikdən sonra artıq sığortaolunan hesab oluna biləcək. İcbari Tibbi Sığorta Agentliyində vətəndaşlara göstəriləcək xidmətin çərçivəsi ilə bağlı müzakirələr aparılır”, - deyə Vüqar Qurbanov əlavə edib.
Nigar HƏSƏNLİ,
Musavat.com
