AFP-nin verdiyi məlumata görə, Fransada iki kişi və bir qadın Rusiyanın xeyrinə casusluq və ictimai rəyə təsir göstərmək cəhdləri şübhəsi ilə saxlanılıb.
Fransa hakimiyyəti bildirib ki, həbslər Fransa-Rusiya təşkilatı SOS Donbass ilə bağlı davam edən istintaqın bir hissəsidir. Saxlanılanlardan biri, 40 yaşlı Rusiya vətəndaşı Vyaçeslav P., Paris prokurorluğu tərəfindən sentyabr ayında Zəfər Tağı üzərində Rusiyayönlü plakatlar asmaqda ittiham olunur. Şübhəlinin şəxsiyyəti müşahidə görüntüləri vasitəsilə müəyyən edilib.
Müstəntiqlərin sözlərinə görə, plakatlar asıldıqdan sonra V.P., Rusiya və Fransa pasportlarına sahib olan SOS Donbass-ın 40 yaşlı rəhbəri Anna N. də daxil olmaqla, digər iki şübhəliyə zəng edib. Qadın Fransanın iqtisadi rəsmilərindən məlumat almağa cəhd etməkdə ittiham olunur. Fransanın dövlət təhlükəsizlik xidməti DGSI, ən azı ilin əvvəlindən N.-ni izləyir və onun "ölkənin fundamental maraqlarına zərər verə biləcək hərəkətlər" etdiyindən şübhələnir. Mart ayında ona qarşı "xarici dövlətə casusluq" şübhəsi ilə istintaq başlanıb. Onu 10 ilə qədər həbs cəzası gözləyir.
Üçüncü şübhəli haqqında bilinən tək şey onun adı Vinsent P., 63 yaşında olması və Paris yaxınlığında yaşamasıdır. Dördüncü şübhəli, 58 yaşlı Bernard F., məhkəməyəqədər həbsdən yayınmağı bacarıb. Lakin o, məhkəmə nəzarəti altına alınıb.
SOS Donbass özünü Ukraynanın müharibədən zərər çəkmiş şərq bölgələrinə yardım çatdıran humanitar təşkilat kimi təqdim edir. Lakin Fransa kəşfiyyat xidməti DGSI təşkilatın əslində casusluq və Fransada sabitliyi pozmağa yönəlmiş hərəkətlərlə məşğul olduğundan şübhələnir.
Rizvan CƏFƏROV,
"Azərbaycan"
