Cənubi Afrika Respublikası (CAR) ABŞ prezidenti Donald Trampın 2026-cı ildə Mayamidə keçiriləcək G20 Sammitinə ölkəni dəvət etməmək qərarından təəssüfləndiyini açıqlayıb. Trampın bu addımı ölkədə ağdərililərə qarşı zorakılığın qarşısının alınmaması və prezidentlik səlahiyyətlərinin vaxtında ABŞ-a təhvil verilməməsi ilə əsaslandırdığı bildirilir.
Editor.az xəbər verir ki, Cənubi Afrika Respublikasının Beynəlxalq Münasibətlər və Əməkdaşlıq Nazirliyi G20-də növbəli sədrliyin rəsmi olaraq nazirliyə təhvil verildiyini açıqlayıb.
Nazirliyin yaydığı bəyanatda Prezident Siril Ramafosanın Trampın G20-də CAR-ın iştirakı ilə bağlı çıxışını təəssüflə qarşıladığı qeyd olunub.
Bəyanatda deyilir:
“Cənubi Afrika G20-nin tamhüquqlu üzvüdür və bu status bütün digər üzvlərin razılığı ilə müəyyən olunub. Ölkəmiz G20-də fəal, konstruktiv və bərabərhüquqlu iştirakını davam etdirəcək. Biz G20 üzvlərini konsensusa əsaslanan çoxtərəflilik prinsiplərinə sadiq qalmağa çağırırıq. Bütün üzvlər təşkilatın bütün strukturlarında bərabər şərtlərlə təmsil olunmalıdır”.
Nazirlik əlavə edib ki, ABŞ-la diplomatik münasibətləri gücləndirmək üçün görülən səylərə baxmayaraq, Tramp CAR ilə bağlı “dezinformasiya və təhriflərə söykənən” sanksiya yönümlü addımlar atmaqda davam edir.
Açıqlamada bildirilib ki, ABŞ-ın G20 sammitində iştirakdan imtinası səbəbindən növbəli sədrliyin təhvil-təslimi Cənubi Afrika Xarici İşlər Nazirliyinin ofisində, ABŞ-ın Pretoriyadakı səfirliyinin nümayəndəsinə təqdim edilib.
Tramp Cənubi Afrikada ağdərili azlığa qarşı “irqi ayrı-seçkilik” iddialarını əsas gətirərək sammitdə iştirakdan imtina edib. Vaşinqton sammitin sonunda dövri prezidentliyi təhvil almaq üçün səfirliyin müvəqqəti işlər vəkili Mark D. Dillardın rəhbərlik etdiyi kiçik nümayəndə heyəti təyin etsə də CAR yüksək səviyyəli iştirak olmadığı üçün rəsmi təhvil-təslim mərasimi keçirməyib.
//Gülnarə Abasova, Editor.az
