ain.az, Sherg.az portalına istinadən məlumat yayır.
3.000 il əvvəl qurulmuş nəhəng bir şəhər aşkar edilib. Mütəxəssislər bu kəşfin bütün bilgiləri alt-üst edəcəyini bildirir.
Sherg.az xəbər verir ki, Misirin Sukari dağlarında aparılan arxeoloji qazıntılar 3.000 illik qədim qızıl mədəni olduğu güman edilən ərazini üzə çıxarıb. “Antik Qızıl Şəhərini Canlandırma” adlı çoxillik layihə çərçivəsində ortaya çıxarılan bu ərazi Misir Turizm və Qədim Əsərlər Nazirliyinin rəsmi açıqlaması ilə gün üzünə çıxıb.
Aşkarlanan struktur yalnız mədənlə məhdudlaşmayıb. Arxeoloqlar qədim dövrdə son dərəcə sistemli şəkildə işlədildiyi müəyyən edilən geniş bir qızıl emalı kompleksinə rast gəliblər və burada hər şeyin qızıl ilə bağlı olması səbəbilə quruluşun dünyada nadir rast gəlinən bir nümunə olduğunu vurğulayıblar.
Kompleksdə kuvars damarlarından qızıl çıxarmağa yarayan tam təchizatlı sahələr, üyütmə və əzilmə bölmələri, süzmə və çökmə hovuzları və qızılı təmizləmək üçün istifadə olunan gil sobalarının qalıqları aşkarlanıb. Yüksək Antikalar Şurasının Baş katibi Məhəmməd İsmail Xalid bu nizamın qədim misirlilərin mədənçiliyə çatdığı səviyyəni açıq şəkildə göstərdiyini bildirib.
Mədən işlərinin genişliyi zamanla bölgədə inkişaf etmiş bir yaşayış məskəninin formalaşmasına səbəb olub. Ərazidə evlər, emalatxanalar, məbədlər, idarəetmə binaları və Ptolemey dövrünə aid hamamlar aşkarlanıb. Bundan əlavə, Roma və İslam dövrlərinə aid memarlıq izlərinin tapılması bölgənin əsrlər boyu müxtəlif toplumlar tərəfindən istifadə edildiyini göstərir.
Qazıntılarda madən işçilərinin sosial həyatına dair mühüm məlumatlar da əldə olunub. Üstündə hiyeroqlif, demotik və yunan yazıları olan 628 keramika parçası, bölgədəki mədəni müxtəlifliyin nə qədər geniş olduğunu sübut edir.
Həmçinin Ptolemey dövrünə aid bürünc pullar, Qreko-Roma dövrünə aid insan və heyvan fiqurlu gil heykəlciklər, Bastet və Harpokrates kimi tanrıların daş heykəlləri, şəxsi əşyaların saxlanıldığı qablar, yarı qiymətli daşlardan hazırlanmış muncuqlar, dəniz balığından və qabıqlardan hazırlanmış bəzək əşyaları və beş ədəd adaq masası da gün üzünə çıxarılıb.
Layihə çərçivəsində aktiv mədən sahəsindən təxminən 3 kilometr uzaqlıqda, 6.3 dönümlük bir ərazidə qədim mədən kompleksinin ölçüləri ilə eyni olan maketi də inşa olunub. Yeni ziyarətçi mərkəzi həm bu mühüm kəşfi, həm də antik Misirdəki qızıl işçilərinin həyatını ətraflı şəkildə təqdim edən sərgilərə ev sahibliyi edir.
Sonrakı hadisələr barədə daha çox məlumat almaq üçün ain.az saytını izləyin.
