BAKI, 28 noyabr. TELEQRAF
Ümumdünya İqtisadi Forumunun son hesabatına əsasən, 2030-cu ilə qədər yeni qlobal makro meyllər nəticəsində 170 milyon yeni iş yeri yaradılacaq.
Teleqraf xəbər verir ki, bu barədə Bakıda keçirilən Gələcəyin Peşələri Sammitində çıxışında Kiçik və Orta Biznesin İnkişafı Agentliyinin İdarə Heyətinin sədri Orxan Məmmədov deyib.
Onun sözlərinə görə, bu dövrdə texnoloji inkişaf, yaşıl keçid, iqtisadi və demoqrafik dəyişiklər fonunda qlobal əmək bazarı əhəmiyyətli dəyişikliyə məruz qalacaq:
“Qeyd edilən meyllər, həmçinin, 92 milyon iş yerinin yox olmasına gətirib çıxaracaq. Generativ süni intellekt texnologiyalarının təsiri altında 2030-cu ilə qədər işçi qüvvəsinin baza bilik və bacarıqlarının 40%-ə yaxınhəcmində dəyişikliyə məruz qalacağı gözlənilir.
Bəs bu yeni şəraitə bizneslər necə adaptasiya ola birlər? Davamlı öyrənmə, ixtisasartırma və ixtisasdəyişmə proqramlarına xüsusi diqqətin yetirilməsi gələcək bilik və bacarıq tələblərinin daha effektiv idarə edilməsi baxımından mühüm əhəmiyyət kəsb edir. Məhz effektiv liderlər və güclü rəqəmsal, analitik və ünsiyyət bacarıqlarına malik istedadlar bizneslərin gələcəyə hazırlığını müəyyən edən əsas amillərdir”.
