Pekin, 28 noyabr, AZƏRTAC
Malayziya Milli Müdafiə Universitetində hibrid formatda “44 günlük Vətən müharibəsi ilə bağlı Azərbaycanın strateji perspektivi” mövzusunda dəyirmi masa keçirilib. Tədbir Azərbaycanın Malayziyadakı səfirliyi və Malayziya Milli Müdafiə Universitetinin birgə təşkilatçılığı, Azərbaycan Milli Müdafiə Universitetinin iştirakı ilə reallaşıb.
AZƏRTAC xəbər verir ki, tədbirdə Zəfər Gününün tariximizdə yeri və əhəmiyyəti, 44 günlük Vətən müharibəsinin Azərbaycan tarixində yeni bir dönəmin başlanğıcı olması haqqında müzakirələr aparılıb. Malayziya Milli Müdafiə Universiteti vitse-kanslerinin müavini xanım Norhana Binti Abdul Halim dəyirmi masanın Azərbaycan torpaqlarının 30 illil işğalına son qoyulması uğrunda aparılan müharibənin təfərrüatları ilə yaxından tanış olmaq üçün geniş imkan yaratdığını bildirərək, tədbirin iki ölkənin Milli Müdafiə universitetləri arasında əməkdaşlığa təkan verəcəyinə ümidvar olduğunu deyib.
Azərbaycan Milli Müdafiə Universitetinin rektoru general-mayor Gündüz Əbdülov onlayn formatda çıxış edərək 2020-ci il sentyabrın 27-də başlanan, 44 gün davam edən və Azərbaycan Prezidenti, Silahlı Qüvvələrin Ali Baş Komandanı İlham Əliyevin rəhbərliyi altında Azərbaycan Ordusunun Qələbəsi ilə başa çatan Vətən müharibəsinin gedişi, qələbəni təmin edən amillər, diplomatik, siyasi xarakterli tədbirlər, informasiya təminatı və s. məsələlər barədə məlumat verib. O bildirib ki, Vətən müharibəsinin qalibiyyətlə nəticələnməsi hərbi uğur olmaqla yanaşı, milli birliyimizin, xalq-dövlət-ordu həmrəyliyinin təntənəsidir. Rektor ordu quruculuğu, Milli Müdafiə Universitetinin fəaliyyəti, onun beynəlxalq əlaqələri və s. barədə də məlumat verərək, iki universitet arasında əməkdaşlıq əlaqələrinin yaradılmasının faydalı olacağını bildirib və malayziyalı həmkarlarını Azərbaycana səfərə dəvət edib.
Səfir İrfan Davudov münaqişənin kökləri və nəticələri barədə məlumat verib, işğala baxmayaraq, Azərbaycanın uzun müddət BMT Təhlükəsizlik Şurasının 4 qətnaməsinin icrasını sülh yolu ilə təmin etməyə çalışdığını, lakin nəticə əldə edilmədiyini və 2020-ci payızında torpaqları azad etmək məqsədilə əks-hücum əməliyyatına başlanıldığını qeyd edib. Bildirib ki, torpaqların azad edilməsi ilə tarixi ədalət bərpa olunaraq, regionda yeni siyasi və geosiyasi vəziyyət formalaşıb.
Azərbaycanın sülh quruculuğu səyləri və Ermənistanla münasibətlərin normallaşdırılması istiqamətində irəliləyişlər barədə də məlumat verən səfir İ.Davudov, xüsusilə Vaşinqtonda sülh sazişinin mətninin paraflanması, Azərbaycan Prezidenti İlham Əliyev, ABŞ Prezidenti Donald Tramp və Ermənistan Baş naziri Nikol Paşinyan tərəfindən birgə bayanatın imzalanmasının bölgədə uzunmüddətli sabitlik və əməkdaşlıq üçün mühüm əsas yaratdığını vurğulayıb.
Dəyirmi masanın panel hissəsində Azərbaycan Milli Müdafiə Universitetinin Hərbi İdarəetmə İnstitutunun rektoru polkovnik Elnur Ələsgərlinin onlayn formatda təqdimatında müharibənin gedişatı, Qələbəni şərtləndirən amillər, döyüşlərin aparılmasında peşəkarlıq, müasir döyüş taktikaları, müharibənin beynəlxalq münasibətlər və beynəlxalq hüquq baxımından dəyərləndirilməsindən bəhs edib.
Malayziya MMU-nin Müdafiə və Beynəlxalq Təhlükəsizlik Araşdırmaları Mərkəzinin direktoru professor Adam Leonq Kok Vey Qələbənin Azərbaycanın beynəlxalq arenada inamlı və müstəqil dövlət kimi mövqelərini daha da gücləndirdiyini vurğulayıb. Bildirib ki, bu Qələbə ölkənin təkcə öz maraqlarını qorumaq iradəsinə deyil, həm də hərbi, diplomatik və texnoloji üstünlükləri effektiv şəkildə birləşdirərək, strateji məqsədlərə nail olmaq bacarığını göstərir.
Dəyirmi masa sual-cab sessiyası ilə davam etdirilib. Həmçinin 2023-cü ilin 19-20 sentyabr antiterror tədbirləri və Zəfər Gününə həsr olunmuş videolar nümayiş etdirilib.
Şahin Cəfərov
AZƏRTAC-ın xüsusi müxbiri
Pekin
