Noyabrın 28-də Bakı Avropa Liseyində Təhsildə İnkişaf və İnnovasiyalar üzrə IX qrant layihəsində qalib olmuş “Sİ laboratoriyası: Sİ tədqiq edək” adlı layihənin açılış mərasimi keçirilib.
Layihənin həyata keçirilməsində məqsəd şagird, müəllim və valideynlərə süni intellekt və ondan istifadə imkanları haqqında məlumat vermək, tədris fəaliyyətində onun tətbiqinə şərait yaratmaq və bununla bağlı layihə iştirakçılarını istiqamətləndirməkdən ibarətdir.
Sİ Laboratoriyası layihəsi 6 ay müddətində həyata keçiriləcək. Layihənin iştirakçıları Bakı Avropa Liseyi və Xəzər rayonu 136 nömrəli tam orta məktəbin 10-15 yaşlı şagirdləri olacaq. Proqram universal öyrənmə bacarıqlarının inkişafına kömək edəcək, yeni nəsli rəqəmsal gələcəyə hazırlayacaq. Müəllim və valideynlər üçün isə süni intellektdən (Sİ) maksimum faydalanmaq və şagirdləri müəyyən risklərdən qorumaq üzrə təlimlər keçiriləcək.
Açılış mərasimində Bakı Avropa Liseyinin direktoru Zülfiyyə Veysova qonaqlara layihənin məqsəd və vəzifələri haqqında məlumat verib.
Sonra təhsildə süni intellektin əsas trendləri haqqında video göstərilib. Layihənin şagird, müəllim və valideyn iştirakçılarının nümayəndələri layihənin məzmunu və əhəmiyyətini açıqlayıblar.
Daha sonra Milli Məclisin deputatları Gülşən Paşayeva, Ceyhun Məmmədov, layihənin tərəfdaşları olan “Azərkosmos”un, 4SİM təşkilatının, İnformasiya Texnologiyaları İnstitutunun, STEAM Mərkəzinin nümayəndələri çıxış ediblər.
Tədbirin qonaqlarına liseydəki STEAM mərkəzi və onun fəaliyyəti dövründə hazırlanmış mühüm layihələrin nümunələri göstərilib. Onlar liseyin “Sərhədsiz diplomatiya” Beynəlxalq Uşaq Diplomatiyası Mərkəzi tərəfindən hazırlanmış “Futuroloji memarlıq” sərgisi ilə də tanış olublar.
Xatırladaq ki, UNESCO 2025-ci ildə Beynəlxalq Təhsil Gününü süni intellektə həsr edib. Bununla UNESCO təşkilata üzv dövlətləri həm müəllimlərin, həm də tələbələrin təhsil sahəsində bu texnologiyadan məsuliyyətlə istifadə etmələri üzrə təlimlərə sərmayə qoymağa çağırır.
Prezident İlham Əliyevin 2025-ci il 19 mart tarixli Sərəncamı ilə “Azərbaycan Respublikasının 2025–2028-ci illər üçün süni intellekt Strategiyası” təsdiq edilib. Bütün bunlar onu göstərir ki, süni intellekt dünyamızı sürətlə dəyişir, təhsil, tibb, elm və yaradıcılıq sahələrində əsaslı dəyişikliklərə səbəb olur
Lakin əksər məktəblilər süni intellekt alətlərinin yalnız passiv istifadəçiləri olaraq qalırlar, onların necə işlədiyini başa düşmürlər və bu texnologiyaların yaradılmasında iştirak edə bilmirlər. Müasir təhsil mühiti müəllimlərdən təkcə fənn biliyinə malik olmağı deyil, həm də rəqəmsal vasitələrdən çevik istifadə etməyi tələb edir. Ancaq müəllimlərin bir çoxu ya süni intellektin imkanları ilə tanış deyil, ya da onu sinfə inteqrasiya etməkdə çətinlik çəkirlər. Bu baxımdan Bakı Avropa Liseyində həyata keçirilən layihə böyük əhəmiyyət daşıyır.
