“Bakıya məğlub olmağa yox, xal və ya xallar qazanmağa gedirik. Bu dəfə uduzmayacağımızı düşünürəm”.
Bu sözləri Sportinfo.az-a açıqlamasında “Karvan Yevlax”ın futbolçusu Şakil Sno “Qarabağ”la bağlı danışarkən deyib.
Turnir cədvəlinin lideri ilə sonuncu yerin sahibinin duelində şok nəticənin qeydə alınacağı inandırıcı görünmür.
Lakin İngiltərədən olan müdafiəçi turun sürprizinə imza atacaqlarına inanır. Hətta bunun üçün əlində əsas da var – “Qarabağ”ın “Napoli” ilə oyundan qayıtması.
Şakili dinləyək:
“Qarabağ”ın gücü barədə danışmağa gərək yoxdur. Təcrübəli və səviyyəli rəqibdir.
Lakin çempionatdakı bəzi oyunlar göstərir ki, istənilən komandadan xal almaq mümkündür. Zərrə qədər də şansımız varsa, ondan istifadə etməyə çalışacağıq.
Ümid edək ki, “Qarabağ”ın ağır İtaliya səfərindən qayıtması xeyrimizə işləyəcək. Meydanı azı 1 xalla tərk etmək üçün əlimizdən gələni edəcəyik.
İndiki məqamda 1 xal bizim üçün qələbəyə bərabərdir”.
Noyabrın 30-da “Azersun Arena”da baş tutacaq qarşılaşmanın start fiti saat 17:00-da çalınacaq.
HƏBİB
