Azərbaycan Respublikası Qida Təhlükəsizliyi Agentliyinin (AQTA) sədr müavini Əziz Şərifov və Azərbaycan Qida Təhlükəsizliyi İnstitutunun İdarə Heyəti sədrinin müavini Elxan Əhmədov İstanbulda “Qida və su israfının qarşısının alınması – gələcəyə sahib çıxmaq” mövzusunda keçirilən yüksəksəviyyəli beynəlxalq paneldə iştirak edib. Tədbir çərçivəsində AQTA sədrinin müavini Əziz Şərifovun Türkiyənin kənd təsərrüfatı və meşəçilik nazirinin müavini Ahmet Bağcı ilə görüşü baş tutub.
AQTA-dan hafta.az-a bildirilib ki, görüşdə “sıfır tullantı” konsepsiyası üzrə müzakirələr aparılıb və Agentliyin bu sahədə həyata keçirdiyi tədbirlər, mövcud təşəbbüslər və planlar barədə qarşı tərəfə məlumat verilib. Qida israfının qarşısının alınması istiqamətində məsuliyyətin artırılması, dayanıqlı qida sistemi və resursların səmərəli idarə olunmasının strateji əhəmiyyət daşıdığı diqqətə çatdırılıb.
Görüşdə iki ölkə arasında ticarət əlaqələrinin mövcud vəziyyəti, idxal-ixrac dinamikası, perspektiv planlar müzakirə olunub. Eyni zamanda, yüksəkriskli məhsulların ixracının sadələşdirilməsi məqsədilə ekvivalentlik və təsdiq sistemlərinin qarşılıqlı tanınması ilə bağlı fikir mübadiləsi aparılıb. Tərəflər bu istiqamətdə əməkdaşlığın genişləndirilməsində maraqlı olduqlarını bildiriblər.
Qarşılıqlı əməkdaşlığın bundan sonra daha intensiv şəkildə davam etdirilməsinin vacibliyi vurğulanıb.
Səfər çərçivəsində, həmçinin Sıfır Tullantı Fondunun rəhbəri Samed Ağırbaş ilə görüş keçirilib. Görüş zamanı Fondun fəaliyyət istiqamətləri və qida israfının azaldılması üzrə həyata keçirdiyi təşəbbüslər barədə məlumat verilib. AQTA ilə Fond arasında gələcəkdə birgə layihələrin icra olunması nəzərdən keçirilib.
