Bəzən həyat sürprizlərlə təəccübləndirə bilir. Elə Kırıkkale sakini 34 yaşlı Adem Gürlerin başına gələn xoş təsadüf kimi.
NOCOMMENT.az Türkiyə mətbuatına istinadən xəbər verir ki, Adem dostunun ona göndərdiyi 6 750 lirəni (270 AZN) görmək üçün bank hesabına daxil olub.
Lakin o hesabına köçürülən pulu görəndə gözlərinə inanmayıb, nitqi quruyub. Belə ki, onun bank hesabına nə az, nə də çox, düz 55 milyon lirə (2,200,000 AZN) pul köçürülüb. Sözügedən məbləğin kim və ya kimlər tərəfindən köçürüldüyü bəlli deyil.
Maraqlısı budur ki, Adem Gürler başına gələn hadisənin şokunda olub, o ilk əvvəl pulu 55 min lirə olduğunu düşünüb.
“Hesabımda pulu görəndə həyat bitdi, xəyallar həqiqətən başladı” – deyən Adem çox keçmədən xəyallarına son qoyub. O, bankla əlaqə saxlayıb, başına gələn hadisədən xəbər verib. Bunun fonunda kişinin hesabı bloklanıb.
Hesablarının bloklandığını və heç bir əməliyyat edə bilmədiyini bildirən Gürler, “Maliyyə Cinayətlərini İstintaq Şurası (MASAK) müsadirə etdiyi üçün bank heç nə edə bilmədi. Deməli, belə ilişib qalmışam. Hazırda bank hesabımdan istifadə edə bilmirəm. İstəyirəm ki, dövlət məmurlarım heç olmasa baxsınlar, bu pulu kim göndərib, hardan veriblər, həqiqətən mənə veriblər?! Mən bunu qanunla həll etmək istəyirəm, mən hesabımdan istifadə edə bilmirəm. Fəhləyəm, bu işlərdən başım çıxmır”.
Buna baxmayaraq, hesabında milyonları olan amma istifadə edə bilməyən Adem dünyanın ən şanslı insanı olduğunu qeyd edib.
