Qara dənizdə Türkiyənin iqtisadi zonası daxilindəki beynəlxalq sularda iki tankeri – “Kairos” və “Virat”ı Ukrayna kəşfiyyatının vurduğu iddia edilir.
“Reuters” agentliyi Ukrayna Təhlükəsizlik Xidmətinin (SBU) bir rəsmisinə istinadən bildirib ki, Rusiyanın beynəlxalq sanksiyalardan yayınmaq və neft ixrac etmək üçün istifadə etdiyi "kölgə donanmasına" aid iki tanker Qara dənizdə Ukrayna qüvvələri tərəfindən vurulub.
Rusiya "kölgə donanmasına" hücum SBU və Ukrayna donanması tərəfindən həyata keçirilib. SBU rəsmisi bildirib ki, Rusiyanın əsas neft terminallarından biri olan Novorossiysk limanına doğru gedən vurulan iki tanker – “Kairos” və “Virat” boş olub.
Ukrayna tərəfi hücum anını əks etdirən görüntülər də yayımlayıb. Hücumlar pilotsuz gəmilərdən istifadə edilərək həyata keçirilib. Ukrayna həmçinin havadan da dronlardan istifadə edərək gəmilərə hücum edib.
Hər iki tankerin ciddi ziyan gördüyü və vurulduqdan sonra sıradan çıxarıldığını deyən SBU rəsmisi, bu hücumların Rusiya neft daşınmasına ciddi zərbə vuracağını bildirib.
Bundan əvvəl Türkiyənin nəqliyyat naziri Əbdülqadir Uraloğlu, Qara dənizin Türkiyə sahillərində olan “Virat” tankerinin bu səhər ikinci dəfə pilotsuz təyyarə hücumuna məruz qaldığını açıqlayıb. Uraloğlunun sözlərinə görə, kapitan radio ilə "PUA hücumu" deyərək həyəcan siqnalı verib.
Qambiya bayrağı altında üzən 274 metrlik boş “Kairos” kimyəvi tankerdə də eyni bölgədə baş verən partlayışdan sonra yanğın başlayıb. Misirdən Rusiyaya gedən gəmidəki 25 heyət üzvünün təxliyə edildiyi açıqlanıb. Bildirilib ki, “Virat” hadisədən təxminən saat yarım sonra “Kairos” vurulduğu barədə həyəcan siqnalı verib.
TAHİR
